Politologu, Avdi Smajljaj, ka deklaruar se rezultatet nga zgjedhjet e 9 shkurtit kanë qenë të pritshme.
Smajljaj ka treguar në studion e emisionin “Ditari” se cilat janë opsionet e mundshme për formimin e një qeveria të re.
“Rezultatet kanë qenë të pritshme. Në vitin 2021 opozita doli ke me vota dhe çfarëdo rikthimi i opozitës nuk do të ishte një kthim, i cili do të mund ta rriste opozitën në atë nivel që njëra prej partive ta bëjë vetë qeverinë. Gjithashtu, ka qenë e pritshme edhe rënia e Lëvizjes Vetëvendosje. E mira e sistemit zgjedhor proporcional është që humbin pak vota – vota shpërndahet përafërsisht sa vota i fiton partia atë përqindje e ka në Kuvend. E meta e këtij sistemi pastaj është që bën të domosdoshëm koalicionin”, tha ai në Tëvë1.
Politologu përmendi faktin se nga këto zgjedhje me rezultatin e partive opozitare që kanë më pak ulëse në Kuvend sesa VV-ja , e që çon në rrugën se nëse nuk ka koalicione mund të vjen rezultati i një “ngërçi institucional”.
“Në rastin tonë, kur asnjëra prej partive nuk është fituese mjaftueshëm për ta bërë vetë qeverinë, atëherë vijmë te ajo që koalicioni është i domosdoshëm. Në rastin tonë ky rezultat partitë opozitare kanë më pak ulëse sesa VV-ja, mirëpo asnjëra prej këtyre kampeve nëse mund ta quaj nuk mund ta bëjë vetë qeverinë pa e përfshi edhe partitë e komuniteteve shumicë. Kjo është një gjendje që mund të na çojë te një ngërç institucional, një bllokim i tij. Mirëpo, meqë VV-ja është fituese i takon që të bëjë përpjekje që ta formojë qeverinë, mirëpo duke ditë që ne jemi një Republikë parlamentare, ku qeveria bëhet, zhbëhet dhe mbahet nga Kuvendi”, deklaroi ai.
Më 9 shkurt rreth 40.59 për qind e mbi 1.9 milion qytetarë me të drejtë vote votuan në Kosovë, pa llogaritur votat nga jashtë dhe me kusht.
Lëvizja Vetëvendosje fitoi 40.83 për qind e votave, Partia Demokratike e Kosovës (22.15%), Lidhja Demokratike e Kosovës (17.59%), Koalicioni Aleanca për Ardhmërinë e Kosovës dhe Nisma (7.47%), dhe Lista Serbe (4.43%)./teve1.info/
