Nga e premtja e 7 shkurtit do të pezullohen nga puna punonjësit e Agjencisë së Shteteve të Bashkuara për Zhvillim Ndërkombëtar USAID në mbarë botën.
Këtë vendim e mori presidenti i ri i SHBA-së, Donald Trump i cili ka filluar riorganizimin e kësaj Agjencie.
E kjo do ta prekë edhe Kosovën, ku tashmë që nga viti 1999, USAID ka investuar më shumë se 1 miliard dollarë në zhvillimin e vendit.
Ehat Miftaraj, drejtor në Institutin e Kosovës për Drejtësi, thotë se kjo do shkaktojë pasoja negative për vendin dhe institucionet.
“Nëse e marrim për bazë vetëm faktin se në sundimin e ligjit ka pasur dhjetëra miliona euro me të cilat janë ndihmuar kryesisht Qeverisë, Ministrisë së Punëve të Brendshme, Policisë, Këshillit Gjyqësor, Këshillit Prokurorial e gjitha institucionet tjera ligjzbatuese në Kosovë, kjo do të ketë ndikim në transparencë, llogaridhënie, efikasitet apo edhe në ofrimin e shërbimeve më të mira nga institucionet e drejtësisë”, shprehet Miftaraj.
Nga ky vendim do ta pësojnë edhe bizneset në vend, ku sipas kryetarit të Lidhjes së Bizneseve të Kosovës, Besart Dreshaj do të vërehet te bizneset vendore që prodhojnë në Kosovë.
“Kjo do të ketë një tronditje të madhe sa i përket sidomos të të bërit biznes te ndërmarrjet e vogla dhe të mesme sepse ato hapat e parë të zhvillimit dhe zgjerimit të veprimtarive të tyre kanë ndodhur në fazën e mbështetjes së USAID-it amerikan dhe këtu kanë qenë miliona euro në pyetje që janë investuar në zhvillimin ekonomik dhe fusha tjera në RKS”, thotë ai.
Sipas tij, kjo mund të çojë edhe te mbyllja e shumë prej tyre që kanë mbijetuar përmes këtyre fondeve.
“Jemi shqetësues sepse ngadalësimi i zhvillimit të bizneseve sidomos në bizneset fillestare, të vogla dhe të mesme mund të ketë pasoja të cilat do ta stagnojnë apo do të vijmë deri te një situatë ku një kompani mund edhe mos të kenë mundësi të zhvillojnë më veprimtaritë e tyre”, ka thënë Dreshaj.
Përgjatë 25 vjetëve, USAID-i ka zhvilluar programe për luftën kundër korrupsionit, sundimin e ligjit dhe qeverisjen e mirë, luftën kundër dezinformimit dhe avokimin e mediave të pavarura, forcimin e shoqërisë civile dhe demokracisë, zhvillimin ekonomik dhe tërheqjen e investimeve të huaja
