Një ndër premtimet që më së shumti është fokusuar nëna e dy fëmijëve, Besa Jashari është ai për shtesat e të vegjëlve.
Madje Jashari kërkon që qeverisja e ardhshme të ketë fokus pikërisht familjen.
“Po shpresojmë që cilido qoftë që fiton zgjedhjet e 9 shkurtit ka me e marrë pak më seriozisht me këtë pjese, me u fokusu më shumë tek familja, me rrit numrin e shtesave për familjarët dhe në këtë rast i përkrahim familjet dhe inkurajojmë lindjet e reja”, tha nëna Besa Jashari.
Por cilat janë premtimet e subjekteve politike për shtesat e fëmijëve?
Kështu tregoi se sa fëmijë e gra lehona kanë përfituar me shtesa mujore gjatë mandatit të tij.
E në zotimet e programit të kandidatit për kryeministër nga LVV, Albin Kurti premtoi shtesa për gjyshërit e gjyshet që kujdesen për fëmijët.
“Secila gjyshe apo gjysh pensionist që përkujdeset për mbesa e nipat e moshës 13 deri 36 muaj kur prindërit punojnë, do të marrin edhe 100 euro shtesë për çdo muaj mbi pensionin ekzistues”.
Ndërsa kandidati i PDK-së për kryeministër, Bedri Hamza premtoi mbështetje për familjet, fëmijët e të cilëve nuk janë regjistruar në çerdhe publike, e që do të subvencionohen me 100 euro.
Kurse, një premtim krejt tjetër ka bërë kandidati për kryeministër nga LDK, Lumir Abdixhiku.
“Për çdo të porsalindur në Kosovë shteti ynë do t’i mbulojë të gjitha shpenzimet e vitit të parë”, tha ai.
Kjo pasi LDK, shtesat e qeverisë Kurti i kishte quajtur lëmosha që nuk mjafton as për ta paguar rrymën.
E Koalicioni për Kosovën fituese ka premtuar shtesa për fëmijë dhe lehonat në kuadër të pakos për mirëqenien e familjeve.
Ndërsa, Koalicioni për Familjen ka premtuar që çdo grua që lind fëmijën e parë, për çdo muaj do të marrë nga 500 euro për dy vite rresht e Gratë që lindin fëmijën e dytë do të marrin nga 750 euro mbështetje mujore për dy vite.
Mirëpo, drejtori i Këshillit për Mbrojtjen e të Drejtave dhe Lirive të Njeriut, Behxhet Shala thotë që nuk po ka premtime më konkrete apo shpresëdhënëse nga subjektet politike për nënat lehona.
“Realisht nuk po ka edhe shumë premtime siç kemi pritur por ato premtime nuk janë se mund të realizohen sepse deri më tani kur ishte bërë më herët një propozim që të ndahen për fëmijët shtesat prej 10 euro më vonë Qeveria Kurti e ka konkretizu e ka rrit pak gjatë mandatit të saj mirëpo nuk është që ka ndonjë propozim të qëndrueshëm që do t’i ndihmonte lehonat për kapërcimin e kësaj faze”, tha Shala.
Në fund të vitit 2024, janë ndarë shtesa prej 100 euro për fëmijët deri në moshën 16 vjeçare.
