Ishte ai që përcaktoi rrjedhat e historisë kur udhëhoqi bombardimet e NATO-s për çlirimin e Kosovës nga okupatori serb.
E ish-gjenerali i aleancës më të fuqishme në botë, Wesley Clark, është rikthyer sërish në Kosovë.
Në mëngjesin e së dielës ai u prit në takim nga kryetari i Lidhjes Demokratike, Lumir Abdixhiku.
Ky i fundit u shpreh falënderues për kontributin që dha gjenerali amerikan për lirinë e Kosovës.
“Gjatë orëve më të rënda të luftës sonë për liri, vendosmëria dhe veprimet tuaja vendimtare i dhanë shpresë dhe forcë një kombi të etur për liri. Udhëheqja juaj gjatë ndërhyrjes së NATO-s ishte një pikë kthese që jo vetëm ndryshoi rrjedhën e historisë sonë, por edhe siguroi mbijetesën dhe të ardhmen e jetëve të panumërta – të njerëzve tanë. Sot, ne qëndrojmë këtu në një Kosovë të lirë dhe sovrane, një dëshmi e sakrificave të bëra dhe e mbështetjes së marrë nga miqtë dhe aleatët tanë”, tha Abdixhiku
Kurse, gjenerali, Wesley Clark, i dha merita LDK-së për intervenimin e suksesshëm të NATO-s në Kosovë.
“Njerëzit shpesh më pyesin: Cila është diferenca kur NATO ndërhyri në Kosovë, por ne shkuam në Libi, shkuam në Irak, dhe çka me Afganistanin? Pse është Kosova ajo që ka qenë e suksesshme? Dhe në Libi ende ka luftë dhe Iraku është Irak dhe e dini për Afganistanin, dhe është një gjë shumë e thjeshtë, LDK”, tha Clark.
Tutje gjenerali amerikan, porositi Kosovën që gjithmonë të mbajë marrëdhënie te ngushta me Shtetet e Bashkuara të Amerikës.
“Shpresoj se do t’i forconi këto lidhje dhe do të vazhdoni t’i shikoni Shtetet e Bashkuara si mikun tuaj të madh. Ne jemi sigurisht krenarë për ju. Përparimi që keni bërë, shembulli që keni dhënë. Demokracia është një rrugë e vështirë, shikoni se çfarë po ndodh në betejat që kemi. Ne themi se jemi demokracia më e vjetër në botë, dhe jemi, por ajo kalon nëpër cikle. Është e vështirë. Dhe sot, do të jetë e vështirë, sepse ne kemi ende kundërshtarë në botë që do të donin ta zëvendësonin demokracinë me diçka tjetër”, u shpreh ai.
Në fund të takimit gjeneralit Clark iu nda dekorata, Ibrahim Rugova, për rolin e tij në çlirimin e Kosovës.
Ai gjatë ditës zhvilloi takim edhe me kandidatin për kryeministër nga radhët e Partisë Demokratike të Kosovës, Bedri Hamzën.
Hamza u shpreh mirënjohës dhe falënderues për ushtaret edhe popullin amerikan.
