Gjenden lehtë në raftet e çdo kioske.
Edhe blerja e tyre në shumë raste bëhet pa dallim moshe.
Nga këto produkte me shije ekzotike, tash e një kohë po shënjestrohen të rinjtë.
“Është shumë problematike përdorimi i cigareve elektronike të cilat janë duke u shitur pa kurrfarë kontrolli dhe janë duke promovuar me qëllimin e vetëm që t’i targetojnë apo t’i shënjestrojnë të rinjtë duke i reklamuar ato produkte me shije të ndryshme ekzotike të cilat e maskojnë shijen e vërtetë të këtyre produkteve dhe veprimin e vërtetë të dëmshëm që kanë këto produkte”, thotë Shkumbin Spahia nga Qendra Kosovare për Zhvillim dhe Avokim.
Sipas kësaj qendre, cigaret elektronike po përdoren nga nxënësit në shkolla.
“Nga monitorimet tona që i kemi pasur të shkurtra është vërejtur se konsumimin e cigareve elektronike është duke u bërë edhe nga nxënësit të cilët gjenden në shkollat fillore, e lëre më në ato të mesme”, tha Spahia.
Këtë e ka konfirmuar edhe drejtori i shkollës ‘’Emin Duraku’’ në Prishtinë, Visar Mani.
“Kemi informata se fëmijët po konsumojnë cigare elektrike të cilat janë bukur të dëmshme për shëndetin, por në mënyrë direkte që t’i zëmë dikujt në trup apo në çantë nuk kemi hasë, por informatat janë që mund t’i përdorin edhe jashtë orarit mësimor. Kemi bërë takime grupore edhe me prindër të fëmijëve të cilët kemi pasë dyshime të caktuara, por megjithatë ne i kemi në monitorim”, tha Duraku.
Mirëpo në shkollat tjera, ka raste kur mësuesit u kanë zënë cigare elektronike nxënësve të tyre.
Për këtë dukuri, prindërit janë të shqetësuar.
“Fatkeqësisht kjo është t’u na ndodhë edhe në shkolla, edhe kudo nëpër ambiente. Fëmijët tanë janë duke i pi dhe ka ankesa të shumta. Megjithatë vetëdijesimi i nxënësve është i obliguar; me i vetëdijesu ose me mbajtë trajnime profesorat nxënësit që nuk duhet cigaren elektronike me përdorë se është me të njëjtin problem si me cigaret normale”, tha nënkryetari i Këshillit të Prindërve, Visar Islami.
Por sa është i dëmshëm për fëmijët konsumimi i këtyre cigareve?
“Përveçse ndikon në zhvillimin e sistemit nervor qendror, nikotina ndikon në përgjithësi edhe në enët e gjakut në organizëm, po edhe në sistemin respirator”, thotë drejtori i Pulmologjisë, Musa Hoxha.
Për këtë shkak, në shtetet në Evropë, përdorimi i cigares elektronike është i ndaluar.
