Problemet në sistem të drejtësisë, u reflektuan edhe në një raport ndërkombëtar për Kosovën.
Raporti i Freedom House, theksoi vazhdimin e ndikimit në procese gjyqësore, çka e bën këtë sistem të brishtë.
“Ndërhyrja politike në gjyqësor mbetet një problem dhe korrupsioni i përhapur në gjyqësor ndikon negativisht në pavarësinë e sistemit të drejtësisë. Prokuroritë dhe gjykatat mbeten të ndjeshme ndaj ndërhyrjeve politike dhe korrupsionit nga elitat e fuqishme politike dhe të biznesit, duke minuar procesin e rregullt ligjor. Megjithëse ligji thotë se të pandehurit nuk duhet të mbahen në paraburgim përpara gjyqit, përveç rastit kur ata kanë gjasa të ikin ose të manipulojnë provat, gjyqtarët shpesh urdhërojnë që të dyshuarit të ndalohen pa shkak. Paraburgimet e gjata janë të zakonshme për shkak të joefikasitetit gjyqësor dhe kufizimeve të burimeve”.
Tutje në raport është cekur edhe mungesa e rezultateve në luftën kundër korrupsionit.
“Ka tendenca të ndërhyrjes së qeverisë në sistemin e drejtësisë, në një farë forme për ta kontrolluar dhe dirigjuar mënyrën se si duhet të funksionojë sistemi i drejtësisë. Pastaj ka ngecje në luftën kundër krimit dhe korrupsionit, e sidomos kundër korrupsionit. Domethënë s’ka fare lëvizje në këtë fushë”, thotë Anton Ndrecaj nga Instituti Clard.
Ndaj këtyre të gjeturave, kërkohet reflektim i institucioneve.
“Konsideroj se ky është një raport i rëndësishëm përmes të cilit akterët e fushës së drejtësisë dhe politikbërjes sa i përket drejtësië, përfshirë qeverinë dhe Ministrinë e Drejtësisë, por edhe akterët e tjerë të rëndësishëm, duhet të reflektojnë për të shikuar mekanizma për zhbllokimin e nyjeve kyqe të sistemit të drejtësisë, posaçërisht sistemin prokurorial në mënryë që të bëhen reformat e duhura”, thotë avokati Asdren Bytyqi.
Në këtë raport, Kosova vazhdon t’i ketë 3.29 pikë, ku 1-shi paraqet nivelin më të ulët të përparimit demokratik.
