Gjykata Speciale në akuzën e re thotë se në periudhën 12 prill 2023 – 2 nëntor 2024 gjatë vizitave në paraburgim, Hashim Thaçi u ka dhënë informacion konfidencial Isni Kilajt, Bashkim Smakajt, Fadil Fazliut dhe Hajredin Kuçit për të ndikuar te dëshmitarët.
Sipas akuzës, Thaçi ka udhëzuar Kilajn, Smakajn, Fazliun dhe Kuçin të ndikojnë në dëshmitë e dëshmitarëve të Prokurorisë si dhe hollësi se si duhej ta bënin këtë.
Siç thotë akuza, Thaçi bashkërendoi tri grupe të veçanta, të formuara me Smakajn, Fazliun dhe Kilajn, dhe persona të tjerë kundër të cilëve nuk janë ngritur akuza, si dhe me Kuçin, me synimin për të ndikuar në dëshmitë e dëshmitarëve të Prokurorisë.
Kundër Thaçit janë ngritur tri akuza për tentativë për pengim të personave zyrtarë në kryerjen e detyrave zyrtare, me anë të pjesëmarrjes në veprimin e përbashkët të një grupi; katër akuza për shkelje të fshehtësisë së procedurës, dhe katër akuza për mosbindje ndaj gjykatës.
Kundër Kilajt, Smakajt dhe Fazliu janë ngritur nga një akuzë për tentativë për pengim të personave zyrtarë në kryerjen e detyrave zyrtare, me anë të pjesëmarrjes në veprimin e përbashkët të një grupi, dhe një akuzë për mosbindje ndaj gjykatës.
Kundër Kuçit janë ngritur dy akuza për mosbindje ndaj gjykatës. Ish-ministri i Drejtësisë ka masën për “detyrim paraqitje”.
