Një qeveri transitore po shihet si opsion për të dalë nga ngërçi institucional.
Këtë ide po e shtyn përpara kryetari i Lidhjes Demokratike të Kosovës, Lumir Abdixhiku.
Kreu i LDK -së përmes një konference për medie para gazetarëve shpalosi 15 – pikat për “Qeverinë e Unitetit Kombëtar”.
Në këtë plan mes tjerash përfshihen, rritja pagave, vettingu ne drejtësi, menaxhimi i krizës energjetike e deri tek organizimi i zgjedhjeve të reja.
Abdixhiku e mbështet këtë ide meqë sipas tij asnjëra parti politike nuk i ka numrat për ta formuar qeverinë.
“Më lejoni që në këtë ditë të prezantojë një agjendë dhe të bëjë thirrje për unitet dhe jo për një koalicion të bashkëqeverisjes, por për një gjendje dalëse emergjente e të dobishme për Republikën e Kosovës. Mund të mos jetë më e mira por këto janë rrethanat aktuale politike” , tha kreu i LDK-së.
Tutje, lideri i LDK-së e konsideron si papërgjegjësi të madhe politike nëse vendi shkon sërish në zgjedhje.
“Sa i përket çështjes së zgjedhjeve, po mund të shkohet në zgjedhje por edhe për këtë çështje duhet të ulemi e të diskutojmë. Vetëm mos harroni, nëse shkohet në zgjedhje do të ishte papërgjegjësi e madhe ndaj vendit dhe qytetarëve”, vlerësoi ai.
“Qeveria e Unitetit Kombëtar”, sipas propozimit të LDK-së, parashihet të zgjas deri në momentin e zgjedhjes së presidentit të ri Kosovës, pasi që mandati i presidentes Osmani përfundon vitin tjetër.
Në anën tjetër, partia fituese e zgjedhjeve Lëvizja Vetëvendosje që në fillim ka qenë kundër idesë së krijimit të një qeverie të tillë të tranzicionit, ndërsa partitë e tjera ka qenë të hapura për të biseduar.
