Pa deputetët e pushtetit të hënën u mbajt seanca e jashtëzakonshme për situatën aktuale në Forcën e Sigurisë së Kosovës. Deputetët e opozitës thanë se janë të shqetësuar me këtë gjendje ku ushtarët e shtetit sipas tyre janë pa bukë.
Seanca e jashtëzakonshme për Forcën e Sigurisë së Kosovës nisi pa prezencën e pushtetit.
Të pranishëm në sallë ishin vetëm deputetë të Partisë Demokratike, Lidhjes Demokratike dhe Aleancës për Ardhmërinë e Kosovës.
Si rrjedhojë seanca u udhëheq nga nënkryetari i Kuvendit nga radhët e PDK-së, Enver Hoxhaj.
Në emër të deputetëve nënshkrues fjalën e mori Bekë Berisha nga AAK, i cili është edhe kryetar i komisionit për Siguri.
Berisha tha se gjendja aktuale me ushqim në FSK është tepër shqetësuese.
Ish ministri i mbrojtjes, Anton Quni, kritikoi ashpër dikasterin që udhëhiqet tani nga Ejup Maqedonci për mënyrën e menaxhimit të ushqimit të ushtarëve.
Madje, dikush kërkoi dorëheqjen e Maqedoncit.
E në këtë seancë u kujtua edhe koha e furnizimit të ushtarëve të UÇK-së me ushqim.
Me këtë rast kreu i AAK-së e quajti spiun kryeministrin Kurti.
Deputeti i Partisë Demokratike të Kosovës, Bekim Haxhiu tha që 16 pjesëtarë të ushtrisë janë dërguar në Komision Disiplinor, meqë të njëjtit janë ushqyer jashtë kazermës.
Krahas, ushqimit deputetët adresuan kritika edhe për kushtet e ushtarëve.
Në fund të seancës, para deputetëve u lexuan edhe pikat e rezolutës.
Por për miratimin e saj nuk pati kuorum, kësisoj punimet e seancës u mbyllën.
