Punën e fillojnë në orën 7:00 të mëngjesit.
Por të premten minatorët e StanTërgut, në thellësinë e tokës, hynë me dy orë vonesë.
Ata vendosën të mos futen në minierë pas një informacioni që kishin marrë se këtë muaj nuk do të marrin shtesat për rrezikshmëri.
Por krejt kjo doli të jetë një dezinformatë.
“Ndërrimi i parë fillon prej orës shtatë, në mëngjes punëtorët nuk kanë hy brenda, e kanë morë një lajm apo me quajt edhe dezinformatë që dikush ju ka zbritë mjetet e rrezikshmërisë të cilat janë qitë pak me herët”, tha Gani Osmani nga Sindikata e Minatorëve të Treçës.
Edhe sipas drejtorit të Minierës së StanTërgut, largimi i shtesave të rrezikshmërisë për minatorët nuk është e vërtetë.
“Ka qenë një dezinformatë rreth ndalesës së rrezikshmërisë në punë që nuk ekziston dhe nuk kemi ne as kompetenca as ligjore as bazë ligjore me ia ndal. Është rregullore që parasheh me marrë shtesën e rrezikshmërisë. Në bazë të kësaj rregullore me të cilën unë nuk jam i kënaqur personalisht, kam kërkuar që kjo rregullore të anulohet sepse këtu një palë e favorizon dhe një palë e diskriminon”, tha Shyqri Sadiku, drejtor në Minierën e StanTërgut.
Sipas Sadikut përhapja e këtyre deziformatave po bëhet nga partitë politike.
“Po e them publikisht që më shumë këtu janë të involvuar edhe politika, po e dijmë që jemi edhe në fushatë zgjedhore, edhe tash po ndikon edhe politika në këto dezinformata të cilat kanë ngritë pakënaqësi të minatorët”, tha Sadiku.
Për shkak të problemeve me pagesë, edhe vitin e kaluar minatorët për javë të tëra bojkotuan punën.
