Dhjetë persona janë shoqëruar nw Polici pwr sulmin e 29 nëntorit në kanalin e Ibër Lepencit në fshatin Vragë të Zubin Potokut.
Me vendim të prokurorit dy prej tyre, me inicialet D.V. dhe D.M. nga komuniteti serb, janë ndaluar ku për personin D.V. është parashtruar kërkesë për caktimin e masës së paraburgimit dhe masa e paraburgimit është caktuar nga Gjykata për 1 muaj, kurse i dyshuari D.M nga Prokuroria është liruar në procedurë të rregullt.
Kjo veturë e policisë, të dielën mbrëma në gjykatore solli një të arrestuar.
Ndërsa sipas avokatit, Ardian Bajraktari, kjo vepër i përmbush të gjitha elementet që të konsiderohet sulm terrorist.
“Përcaktuar me nenin 128 e ndërlidhur me veprën penale rrezikim i rendit kushtetues me dëmtim ose shkatërrim të pajisjeve publike të përcaktuara me nenin 122, sipas të cilit shkalla e ndëshkueshmërisë së veprës penale është jo më pak se 5 vite burgim e në rrethana kur nuk përcaktohet maksimumi i veçantë, atëherë aplikohet maksimumi i përgjithshëm i dënimit me burgim deri në 25 vite”, ka thënë Bajraktari.
E menjëherë pas sulmit, në vendngjarje u pa kryeministri i Kosovës, Albin Kurti.
Pas tij, në terren dolën edhe ministrat, Xhelal Sveçla, Elbert Krasniqi e Artane Rizvanolli.
Por, edhe zëvendësministrat, Hysen Durmishi e Arbër Vokrri.
E njohësit e drejtësisë në vend, thonë se përfshirja e politikës në këto raste, mund ta pengoj procesin e hetimeve.
“Sa i përket stadit në të cilin ndodhet procesi, para së gjithave, në radhë të parë vlerësoj që duhet organet e zbatimit të ligjit, përfshirë policinë në koordinim edhe me Prokurorin e Shtetit të ndërmarrin veprime me qëllim të zbardhjes së kësaj ngjarje. Ndërsa politika sa më tepër që të distancohet në këtë fazë të procesit, do të ishte mirë. Vlerësoj që po ashtu është shumë e rëndësishme që krahas organeve të zbatimit të ligjit të prodhohet edhe një raport me prezencën e faktorit ndërkombëtar me theks të veçantë, EULEX dhe KFOR të cilat kanë rol dhe mandat në veri të Kosovës, në të cilin do të konstatohej përfshirja qoftë drejtpërdrejtë ose indirekt të shtetit serb në këtë ngjarje”, ka thënë avokati Bajraktari.
Ndryshe, Prokuroria Speciale e Kosovës, ka bërë të ditur se nga dhjetë të shoqëruarit në polici, vetëm njërit i është caktuar masa e paraburgimit prej 1 muaji.
