Kandidati i Lëvizjes Vetëvendosje për kryetar të Prishtinës, Hajrulla Çeku, ka shpalosur një propozim të ri për transformimin e lagjes Kodra e Trimave, duke premtuar se ajo do të shndërrohet në një model shembullor për kryeqytetin.
Në një takim me banorët, Çeku tha se gjendja aktuale e lagjes lejon vetëm ndërhyrje të vogla, të cilat sipas tij nuk përmirësojnë dukshëm cilësinë e jetës së qytetarëve.
Ai theksoi se propozimi i tij është që Kodra e Trimave të ndërtohet nga e para, përmes një plani gjithëpërfshirës që përfshin komunën, banorët, pronarët e tokave, sektorin privat dhe ndërtuesit.
“Jam i sigurt se nuk do të jetë proces i lehtë, por kur jemi bashkë mund ta bëjmë. Do të kemi planin më të mirë për ndërtimet e reja, për kanalizimin, ngrohtoren, ujin e pijes, rrugët e rrugicat, parqet, çerdhet, shkollat dhe shëndetësinë. Kodra e Trimave e meriton një standard të lartë të jetës”, tha Çeku.
Ai e cilësoi këtë projekt si një nga më ambiciozët që është propozuar ndonjëherë për Prishtinën pas luftës, duke e parë si plan transformues dhe model urbanizimi për qytetin.
Çeku kërkoi mbështetjen e banorëve për këtë nismë, duke u zotuar se zgjidhja e tij do të jetë një transformim rrënjësor i lagjes.
