Ministri i Kulturës, Hajrullah Çeku e ka quajtur të paprecedent dhe të papranueshëm ndalimin e shfaqjes së dy filmave në Shtëpinë e Kulturës në Bujanoc.
Sipas tij, kjo është mosdurim nacional, përcjell teve1.info
“Pa asnjë motiv konkret, e madje duke e paragjykuar përmbajtjen e filmave, autoritetet serbe ndalojnë shfaqjen e filmave deri në një vendim të radhës. Ky akt më e pakta që mund të emërohet, është mosdurim nacional. E për fat të keq ka ende qarqe politike brenda, në rajon e jashtë që besojnë në ndryshimin e Serbisë. Pikërisht politizimi nga ana e Serbisë edhe i artit, me të vetmin motiv që filmi është me aktorë shqiptarë dhe mbështetet nga Qeveria e Republikës së Kosovës, është përgënjeshtrimi më i madh që Serbia ka ndryshuar, apo se mund të ndryshojë”, ka shkruar ai.
Çeku bëri të ditur se “ky projekt ishte njëri nga 78 projektet që Qeveria jonë i mbështeti financiarisht përmes Këshillit Kombëtar Shqiptar. Projekte këto që bartnin aktivitete në ruajtjen dhe kultivimin, avancimin e artit, gjuhës, arsimit e identitetit kombëtar shqiptar në Luginën e Preshevës”.
Anulohen filmat shqiptarë të financuar nga Qeveria e Kosovës në Bujanoc
