Presidentja e Republikës së Kosovës, Vjosa Osmani, ka pranuar mesazhe urimi nga liderë ndërkombëtarë me rastin e 18-vjetorit të Pavarësisë së Kosovës.
Nga Republika Çeke presidenti Petr Pavel ka përgëzuar Osmanin dhe qytetarët e Kosovës, duke vlerësuar marrëdhëniet miqësore dhe partneritetin e konsoliduar ndërmjet dy vendeve.
Ai ka shprehur besimin se bashkëpunimi do të vazhdojë të thellohet, duke kontribuar në stabilitetin dhe prosperitetin rajonal, si dhe ka rikonfirmuar mbështetjen për integrimin evropian dhe euroatlantik të Kosovës.
Mesazh urimi ka ardhur edhe nga Australia, përkatësisht nga Guvernatorja e Përgjithshme, Sam Mostyn.
Në letrën e saj, ajo ka përgëzuar presidenten Osmani për lidershipin në avancimin e Agjendës për Gratë, Paqen dhe Sigurinë (WPS), duke theksuar rëndësinë e përfshirjes së grave në proceset e paqes dhe vendimmarrjes për arritjen e një paqeje të qëndrueshme.
Mostyn ka shprehur besimin se marrëdhëniet mes dy vendeve do të forcohen edhe më tej gjatë vitit në vijim.
Ndërkaq, presidenti i Estonia, Alar Karis, ka vlerësuar marrëdhëniet e ngrohta dhe të qëndrueshme mes dy shteteve, duke theksuar përkushtimin për forcimin e mëtejshëm të bashkëpunimit.
Ai ka nënvizuar se, përballë sfidave globale, thellimi i bashkëpunimit për paqe dhe siguri është më i rëndësishëm se kurrë.
Po ashtu, mesazh urimi ka dërguar edhe presidentja e Bullgarisë, Iliyana Yotova, e cila ka theksuar marrëdhëniet e ngrohta dhe partneritetin e fortë ndërmjet dy vendeve.
Ajo ka rikonfirmuar mbështetjen bullgare për konsolidimin e Kosovës si shtet i pavarur, demokratik dhe të integruar në institucionet ndërkombëtare, me perspektivë të qartë për integrim evropian.
