Presidenti i UEFA-s, Aleksander Çeferin, ka thënë se Evropiani 2027 për U21 që do të organizohet nga Shqipëria e Serbia është shembulli më i mirë që tregon se në futbollin evropian nuk ka kufij të vërtetë.
Çeferin foli në hapje të Kongresit të 49-të të UEFA, që po mbahet në Beograd.
“E shikoni një turne si EURO U21, të organizuar së bashku nga Shqipëria dhe Serbia, si një shembull i shkëlqyer: për të na kujtuar se nuk ka kufij të vërtetë në futbollin evropian”, ka thënë ai.
Tutje, udhëheqësi i UEFA-s u shpreh se futbollit evropian duhet të vazhdojë të qëndrojë si model uniteti në botën që po ndahet gjithmonë e më shumë.
“Futbolli është më shumë se një sport: është një pasqyrë dhe një model i shoqërisë. Ai flet një gjuhë universale që shkon përtej kufijve, bashkon komunitetet dhe frymëzon ëndrrat. Futbolli evropian duhet të vazhdojë të qëndrojë si model për unitetin në këtë botë gjithnjë e më të ndarë. Dhe të bashkuar do të qëndrojmë”, ka deklaruar Çeferin.
Në kongresin që po mbahet në Beograd është i pranishëm edhe kryetari i Federatës së Futbollit të Kosovës, Agim Ademi. Në Qendrën e Kongresit “Sava” po valëvitet flamuri i Kosovës.
