Serbia po kalon nëpër një krizë të thellë politike.
Protestat e studentëve nuk po ndalen, ndërsa në kuvendin serb gjatë së martës pati edhe përplasje fizike mes deputetëve.
Madje, opozitarët për ta bllokuar punën e kuvendit hodhën gazlotsjellës dhe mjete të tjera piroteknike.
Në një moment kryeparlamentarja, Ana Bërnabiq, duke i kundërshtuar veprimet e opozitës përdori gjuhë fashiste ndaj shqiptarëve.
Ajo iu tha deputetëve të opozitës se janë bërë heronj të Albin Kurtit dhe medieve në Kosovë.
Për kryeministri Kurti pati disa fjalë edhe zëvendëskryeministri nacionalist serb, Aleksandar Vulin.
E pse kaq shpesh po përmendet kryeministri kosovar në kuvendin e Serbisë, e ka një shpjegim politikani socialdemokrat nga Vojvodina, Nenad Çanak.
“Nuk është për çudi që e dëgjoni emrin e Albin Kurtit në kuvendin e Serbisë sepse përfaqësuesve politik këtu iu duhet një armik i jashtëm dhe në këtë rast është Kurti si kryeministër i Kosovës. Kjo po ndodh edhe për arsyen se Kurti është dëshmuar si negociator i fortë në raport me Serbinë dhe kjo mjafton që ai të jetë armiku i opozitës dhe i regjimit”, thotë Çanak për Tëvë1.
Çanak është shprehur kritik edhe ndaj opozitës për të cilën thotë se në shumë çështje ka qëndrime edhe më ekstreme se partia në pushtet.
“Të gjitha këto ngjarje ne parlament u provokuan nga opozita impotente ne Serbi. Protestat që po zhvillohen në Serbi nga studentet kanë marrë vëmendje të madhe ndërsa opozita nuk ka ndonjë kauzë të fortë dhe kanë mbetur nën hijen e studentëve. E ashtuquajtura opozitë po synon që përmes këtyre veprimeve jo konstruktive të marrë vëmendje, por në fakt ata në disa çështje politike përfshi edhe Kosovën kanë qëndrime dhe më ekstreme se partia në pushtet e Vuçiqit”, shprehet ai.
E pavarësisht faktit që ka disa muaj që vazhdimisht po mbahen protesta masive kundër regjimit në Serbi, Çanak thotë se nuk mjaftojnë për ta rrëzuar nga pushteti presidentin autoritar, Aleksandar Vuçiq.
Sipas tij për të bërë ndryshime serioze politike duhet të ketë protesta gjithë popullore sikurse në kohën e Millosheviqit.
“Vuçiq është nervoz por kjo nuk nënkupton se karrigia e tij po lëvizet. Ai është ende në pushtet dhe ka akoma fuqi për të kontrolluar gjithçka. Ai madje së fundmi po synon t’i kap edhe ato pak medie të lira që kanë mbetur në Serbi. E vetmja mënyrë që mund ta rrezikojë pushtetin e Vuçiqit është nëse ka protesta gjithë popullore, por për këtë nuk po shoh gatishmëri tek populli. Protesta të fuqishme ishin ato kur populli ngrit për ta kundërshtuar Slobodan Millosheviqin”, thotë politikani serb.
Studentët në Serbi po protestojnë prej muajsh kundër korrupsionit dhe rreziqeve ndaj sigurisë publike, teksa po bëjnë thirrje për reforma të thella.
Në janar, kryeministri i Serbisë, Millosh Vuçeviq ka dhënë dorëheqje pas protestave dhe incidenteve të shumta në Serbi.
