Në shtator pritet të mbahet takimi i radhës në kuadër të dialogut, ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiq.
Ish-diplomati, Blerim Canaj, vlerësoi se mbajtja e këtij takimi mund ta ketë për qëllim diskutimin e zgjedhjeve të reja në veri të vendit, raporton teve1.info.
“Në atë takim mund të ndodhë të diskutohet vetëm për zgjedhjet. Po ashtu, mendoj që mund të ketë intensifikim të presionit mbi palët. Tani mund të ballafaqohemi me presion më të madh sesa që e kemi pasur më herët, e posaçërisht në palën kosovare, sepse topi është tani te ne”, theksoi Canaj në emisionin “Ditari” në Tëvë1.
Madje sipas tij, Kosova duhet të jetë e gatshme që me përfundimin e zgjedhjeve në veri, do t’i shtohet përsëri presioni mbi themelimin e Asociacionit.
Ndërkaq, lajmin se në shtator do të mbahet takimi i ri i nivelit të lartë në kuadër të dialogut, e bëri të ditur Emisari i BE-së për dialogun Kosovë – Serbi, Miroslav Lajçak. /teve1.info/