Presidenti i Francës, Emmanuel Macron, ka paralajmëruar masa për Kosovën dhe Serbinë nëse të dyja vendet nuk sillen me përgjegjësi.
Madje presidenti francez ka paralajmëruar se mund të ketë rishikim të vendimit për vizat.
“Franca dhe Gjermania i kanë bërë premtimet e tyre për politikat e vizave dhe çështjet tjera ekonomike, të cilat do të rishikohen nëse të dy palët nuk sillen me përgjegjësi. Ne duhet të jemi tejet kujdesshëm në këtë drejtim, posaçërisht kur stabiliteti i Ballkanit Perëndimor është në rrezik”, ka thënë Macron.
E ish-diplomati, Blerim Canaj, vlerësoi që paralajmërimi për çështjen e vizave duhet patjetër të merret më seriozisht, derisa shtoi që Kosova aktualisht gjendet në pozicion më të vështirë se sa Serbia.
“Si duket Bashkësia Ndërkombëtare e ka humbur durimin me Qeverinë Kurti. Sa i përket paralajmërimit për liberalizimin e vizave, kjo temë duhet të merret seriozisht për shkak se këtë vendim e marrin një grup njerëzisht. Kosova është në një pozicion paksa më të vështirë se Serbia. Ka kaluar ajo periudhë kur bota e ka pasur njëfarë simpatie për fatkeqësinë tonë. Kosova duhet të jetë e kujdesshme, sepse gjithmonë ka qenë e rëndësishme që në shumë çështje, së paku të paraqitemi si palë konstruktive në dialog”, deklaroi Canaj në emisionin “Ditari” në Tëvë1.
Kujtojmë se komentet e Macronit vijnë në një kohë kur Kosovës i është bërë thirrje vazhdimisht të kthehet në dialog me Serbinë dhe t’i organizojë zgjedhjet e reja në veri të vendit./teve1.info/
