Ish-konsulli i Kosovës në Gjermani, Blerim Canaj ka thënë se nuk beson se do të ketë diçka konkrete sa i përket hapjes për qarkullim të urës mbi lumin Ibër në Mitrovicë.
Duke komentuar deklaratën e ministrit të Administrimit të Pushtetit Lokal, Elbert Krasniqi se po trajtohet një gjë e tillë, ai e ka quajtur më shumë deklaratë për konsum të brendshëm.
“Hapja e Urës së Ibrit është në trajtim e sipër që nga viti 1999, që nga mbyllja e urës. A mund të themi ne që nuk ka qenë kurrë në trajtim? Gjithmonë ka qenë në trajtim e sipër dhe do të vazhdojë që të jetë, deri sa të hapet. Po diçka konkrete unë nuk e besoj për shkak se tek e fundit prapë po përsëritem, duhet vullneti i të dyja palëve. Ne nuk e kemi pasur urën e hapur kur i kemi pasur disa institucione atje, kur i kemi pasur së paku një pjesë të komunitetit serb të integruar në ato institucione dhe sot po më duket goxha utopike dhe po më duket që është thjesht deklarata për konsum të brendshëm”, ka thënë Canaj në emisionin Ditari në Tëvë1.
Canaj ka thënë se nëse kjo Qeveri e hapë urën, i dëshiron edhe dy mandate tjera, porse për një gjë të tillë sipas tij nuk është vullneti as i faktorit ndërkombëtar.
“Nëse Elbert Krasniqi dhe kjo Qeveri e hapë urën, i dëshiroj edhe dy mandate tjera. Nuk po e shoh se si do të mund të hapet: a do t’i dërgoj policinë atje, a do ta hapë me polici, tek e fundit një vullnet të tillë nuk po e shoh edhe nga bashkësia ndërkombëtare që ta përkrahë, përderisa Lajçak del e thotë që duhet vullneti i të dy palëve, përderisa ne nuk dëgjuam ndonjë deklaratë nga ndonjë faktor tjetër ndërkombëtar që është pro hapjes së asaj ure apo që duket që është deklaratë serioze, ne mund të futemi me një situatë sikur që u futëm në kohën e tabelave kur 20 vjet punë i kthyem në pikën zero”, ka deklaruar Canaj.
“Çdo veprim i pamenduar, populist, na kthen disa vite prapa dhe disa hapa prapa”, ka shtuar ai.
