Ish-diplomati, Blerim Canaj, tha se presidentja e vendit, Vjosa Osmani, tani po e përfaqëson Kosovën në vendet kur duhej ta bënte, kryeministri, Albin Kurti.
Sipas tij, një gjë e tillë po ndodh pasi partnerët tashmë “kanë humbur besimin tek Kurti”.
“Diku ku duhet të shkojë kryeministri Kurti, tani po na përfaqëson presidentja Osmani. Kjo ndodhë për shkak se presidentja shihet si partneri i fundit për bashkëbisedim. Si duket, kryeministri vetëm e ka humbur besimin si partner gjatë këtyre viteve, për shkak se e ka humbur besimin në shumë çështje. Shtetet e Bashkuara të Amerikës, si dhe shtetet tjera të rëndësishme, partnere të Kosovës, njëkohësisht po dëshirojnë ta përfitojnë Serbinë si partner”, deklaroi Canaj në emisionin “Ditari”.
Ndërkaq, sa i përket situatës së fundit në Banjskë të Zveçanit, Canaj tha se Kosova dhe Serbia, aktualisht nuk janë fare të interesuara për Veriun e Mitrovicës, teksa shtoi që interes i vetëm i tyre është pozicioni politik, shkruan teve1.info.
“Dalin qeveritarët dhe lavdërohen sikur e kanë menaxhuar ata situatën. Çka nëse atyre, madje edhe ndokujt nuk i është lejuar të futet në zyrë, përkatësisht ku ka qenë përfaqësuesi i KFOR-it dhe drejtori i Policisë së Kosovës. Kjo i ka ndodhur ndoshta ndonjë akteri politik e që i kanë thënë “kjo nuk është punë për ty”. Ka të ngjarë që kjo i ka ndodhur një ministri. Mirëpo, duket që është harruar se për tu lavdëruar janë thjesht Policia e Kosovës, për tu lavdëruar është puna 20-vjeçare për ndërtimin e një institucioni të tillë’, shtoi tutje Canaj në Tëvë1.
