Ish-diplomati, Blerim Canaj, thotë se me draft-statutin e Asociacionit mund të krijohet një mini-republikë brenda Republikës së Kosovës.
Canaj, tha se takimet e Ohrit dhe të Brukselit kanë sjellë një autonomi brenda Kosovës.
“Po bëhet gjithnjë e më e qartë që nga takimet e Ohrit, apo zotimet e Ohrit, por edhe ajo në Bruksel thjesht e kanë sjellë një autonomi brenda Republikës së Kosovës, vetë autonomia e tillë është anti-kushtetuese, për shkak se Kushtetuta jonë nuk njeh autonomi brenda territorit të Kosovës. Natyrisht që mund të ketë eksponentë që mund të jenë pro, apo të tentojnë që ta zbusin apo ta relativizojnë. Ne do të ballafaqohemi me këtë çështje deri në pafundësi, duhet të jemi të kujdesshëm. Kjo mund të themi që ndoshta është një mini-republikë brenda Republikës së Kosovës”, tha ai në emisionin “Info Nata” në Tëvë1.
Sipas tij, ky draft i Asociacionit nuk përputhet me kushtet që janë paraparë për organizatat joqeveritare.
“Në qoftë se ne e shohim historikisht se si ka ardh deri këtu, ne të gjithë e dimë që kjo ka filluar me idenë që ky Asociacion të jetë njëjtë sikur Asociacioni i tashëm i komunave të Republikës së Kosovës, një lloj OJQ-je. Mirëpo, nga ajo që po shohim tani absolutisht ne nuk kemi të bëjmë me një OJQ”, shtoi ai./teve1.info/
