Ky është personi i cili aktualisht mban postin e prokurorit tek Zyra e Prokurorit të Specializuar, për të cilin ish presidenti Hashim Thaçi ka ngritur shqetësim për keqtrajtim.
John Daveney, që para se të bëhej prokuror, kishte shërbyer si roje burgu e në disa pozita tjera në qendrën e paraburgimit, sipas Thaçit, ka cenuar fizikisht dhe kërcënuar ish krerët e UÇK-së.
Nga Gjykata Speciale, treguan se çfarë veprime kanë marrë pas këtyre shqetësimeve të Thaçit.
“Menjëherë pasi Z. Thaçi ngriti shqetësimet e tij në gjykatë, një prokuror tjetër mori përsipër dhe personi në fjalë u largua nga salla e gjyqit. Kjo masë e menjëhershme ishte që Z. Thaçi të ndihej më rehat. Nuk ka asnjë tregues se të paraburgosurit janë keqtrajtuar. Pas shqetësimeve që Z. Thaçi ngriti në gjykatë, Mbrojtja kishte kërkuar informacion nga Zyra e Prokurorit të Specializuar dhe nga Regjistri në lidhje me një konflikt të mundshëm interesi. Në dosjen e paraqitur nga Regjistruesja më 7 maj 2025, ajo sqaron se “Nuk ka të dhëna, shënime ose korrespondencë të brendshme në lidhje me shqetësimet e ngritura se [REDAKTUAR] mund të ketë pasur ndonjë grindje verbale ose fizike me ndonjë të Akuzuar”, ka thënë Angela Griep, zëdhënëse në Gjykatën Speciale.
Shprehja e këtij shqetësimi nga ana e Thaçit para trupit gjykues në një seancë të mbyllur në muajin mars të këtij viti, sipas Nasim Haradinaj, tregon se situata ka qenë serioze.
“Për me deklaru kështu presidenti Hashim Thaçi, do të thotë që ka ndodhë diçka shumë e madhe. Kur ai e thotë këtë, as nuk e kam fijen e dyshimit, sepse gjërat e vogla jemi mundu m’i kalu.”, ka thënë Haradinaj.
Mirëpo, jo vetëm Daveney pati një sjellje të tillë me të akuzuarit.
Haradinaj, thotë se edhe Salih Mustafa ishte përballur me presion nga ana e prokurorëve, duke dashur ta nxisin deri në vetëvrasje.
“Cali e ka pas presionin për bashkëpunim me prokurorin. Calin kanë dashtë me qu afër vetëvrasjes, por që Cali ka qenë i fortë dhe ka pas përvojën nëpër burgjet politike jugosllave. I kanë bo presion me bashkëpunu dhe atëherë ka qenë Alex Ëhiting që i ka ardhë në zyre, e ka qu poshtë dhe e ka marrë në pyetje për bashkëpunim. Për mospranimin e tij për bashkëpunim, Calin e kanë dënu me 9 muaj me izolim dhe ka hjek si njerëzit e Guatenamës. Me përjashtim të torturës fizike që nuk e ka pasë, çdo torturë, çdo ndalesë e çdo persekutim ia kanë bo Calit”, thotë Haradinaj.
Këto raste në qendrën e paraburgimit po vlerësohen si skandaloze ndaj të cilëve kërkohet reagim institucional.
Për çfarëdo pretendimi nga ana e të akuzuarve për ndonjë padrejtësi, Specialja, theksoi se ata kanë të drejtë t’i adresojnë tek avokati Ii popullit.
