Te enjten në zyrat e Federatës së Futbollit të Kosovës (FFK), është bërë tërheqja e shortit për zyrtarët e ndeshjeve të xhiros së dhjetë të Superligës.
Pothuajse, të gjitha duelet në këtë xhiro do të jenë interesante, por vëmendja do të jetë në qytetin e Suharekës, ku kampioni në fuqi, Ballkani përballet me skuadrën e Suharekës.
Kjo ndeshje luhet të dielën prej orës 13:00, ndërsa gjyqtar kryesor do të jetë Lirim Jashari.
Jashari do të asistohet nga Altin Zhegrova e Meriton Berisha, ndërsa Egzon Dakaj është gjyqtar i katërt.
Të dielën në të njëjtën kohë, në Klinë do të përballen Dukagjini e Llapi, ku Mervan Bejtullahu do të jetë gjyqtar kryesor i këtij dueli.
Ndihmësit e Bejtullahut, janë Bujar Selimaj e Alban Ejupi kurse gjyqtar i katërt do të jetë Gramos Shala.
Edhe të shtunën, do të luhen dy ndeshje: Malisheva – Prishtina dhe Feronikeli ’74 – Drita.
Alban Shala do të jetë kryesori në Malishevë, me ndihmësit Arbnor Bullatovci e Bekim Rama derisa gjyqtar i katërt është Isak Ceroviku.
Ndërkohë, në Drenas janë caktuar Mentor Ajeti kryesor, Granit Hyseni e Gëzim Mehmeti asistentë, si dhe Ilir Mehmeri si i katërti.
Dardan Çaka do të jetë gjyqtar kryesor në ndeshjen e së premtes Gjilani – Ferizaj që edhe hap xhiron e dhjetë.
Çaka do të ndihmohet nga asistentët Besnik Morina e Kastriot Peci, ndërsa Valon Bajgora do të jetë gjyqtar i katërt.
