Hulumtuesi i Institutit Demokratik të Kosovës, Eugen Cakolli vlerëson se barra kryesore e përgjegjësisë politike për dështimin e konstituimit të Kuvendit bie mbi Lëvizjen Vetëvendosje si partia që ka dalë e para në zgjedhjet e 9 shkurtit dhe që kishte të drejtën për të propozuar kandidatin për kryeparlamentar.
Cakolli ka thënë se moskonstituimi i Kuvendit as në përpjekjen e 54-të, brenda afatit që e kishte përcaktuar Gjykata Kushtetuese është një “përfundim i turpshëm i një krize që u zvarrit me vetëdije”.
“Një përfundim i turpshëm i një krize që u zvarrit me vetëdije. Kuvendi nuk u konstitua as në përpjekjen e 54-të, duke dështuar kësisoj në përmbushjen e obligimit kushtetues për t’u konstituar brenda 30 ditëve. Barra kryesore e përgjegjësisë politike së gjithë këtij dështimi bie qartazi mbi subjektin politik që ka dalë i pari në zgjedhje dhe që kishte të drejtën për të propozuar kandidatin për kryetar Kuvendi. Por e drejta nuk mjafton kur mungon vullneti për konsensus dhe për ta çuar procesin përpara”, ka shkruar ai në Facebook.
Sipas tij, tashmë jemi në një situatë të paprecedentë, me një Kuvend jofunksional e jolegjitim dhe me një qeveri në detyrë, të zgjedhur nga legjislatura e parafundit ‘anëtarët e së cilës nuk kanë as autoritet ligjor për vendimmarrje’.
“Nga sot, nuk do të kemi më seanca me improvizime e arbitraritet, si në sagën e mbi 100 ditëve të kaluara – një periudhë që, mbi të gjitha, shpërfaqi mungesën e përgjegjësisë politike dhe refuzimin e kompromisit si vlerë demokratike. Tashmë jemi në një situatë të paprecedentë, me një Kuvend jofunksional e jolegjitim dhe me një qeveri në detyrë, të zgjedhur nga legjislatura e parafundit – anëtarët e së cilës nuk kanë as autoritet ligjor për vendimmarrje”, ka shtuar ai.
Në fund të postimit Cakolli ka theksuar se qytetarët nuk e kanë merituar një shtet në pauzë për shkak të llogarive të ngushta partiake.
