Eugen Cakolli nga Instituti Demokratik i Kosovës ka kritikuar kryeministrin në detyrë, Albin Kurti, për mbajtjen e takimeve konsultative për formimin e qeverisë së re në ndërtesën e Qeverisë.
Sipas Cakollit, kjo praktikë është e gabuar dhe nuk duhet të normalizohet, pasi qeveria aktuale është ende në detyrë dhe nuk ka mandatim zyrtar për formimin e ekzekutivit të ri.
“Nuk është në rregull dhe as s’duhet të normalizohet që takimet ‘konsultative’ për formimin e qeverisë së re të mbahen në ndërtesën e Qeverisë – e aq më pak që për to të lëshojë njoftim Zyra e Kryeministrit. Kjo zbeh kufirin mes shtetit dhe partisë dhe tregon shumë për mënyrën si konceptohet pushteti”, ka shkruar Cakolli në Facebook.
Ai tha se këto takime duhet të organizohen në seli partie ose ambiente neutrale, dhe jo në zyra publike që u përkasin të gjithë qytetarëve.
Ndryshe, përmes një komunikate nga Zyra e Kryeministrit të mërkurën u bë e ditur se Kurti u takua me Emilija Rexhepin dhe Nenad Rashiqin brenda objektit të Qeverisë për t’u konsultuar për formimin e qeverisë së re./teve1.info/
