Eugen Cakolli nga organizata Demokracia në Veprim ka kritikuar ashpër përpjekjet për të relativizuar manipulimin e votave, duke theksuar se debati publik po devijohet nga çështja thelbësore.
Sipas Cakollit, fokusi nuk duhet të jetë te krahasimet se “kush ka manipuluar më shumë”, por te pyetja themelore nëse ka pasur apo jo manipulim zgjedhor. Ai ka theksuar se çdo individ i përfshirë në manipulim të votave duhet të mbajë përgjegjësi ligjore.
“Pas gjithë këtij zhvillimi shoqëror, është shqetësuese që po tentohet të relativizohet manipulimi i votave, duke e zhvendosur debatin nga faktet konkrete te krahasimet partiake. Për disa, më e rëndësishme po duket gjatësia e kolonave në grafe sesa emrat, numrat dhe faktet reale”, ka deklaruar Cakolli.
Ai ka shtuar se arsyetimi se “po, kemi keqpërdorur, por të tjerët edhe më shumë” është i papranueshëm dhe përbën justifikim të hapur të krimit elektoral.
“Çdo përpjekje për ta shndërruar krimin zgjedhor në një garë krahasuese mes partive është ose padituri, ose mbrojtje e drejtpërdrejtë e vjedhjes. Në të dyja rastet, kjo qasje është pjesë e problemit. Përgjegjësi duhet të ketë për çdo votë të manipuluar dhe në burg duhet të përfundojë secili që ka kryer manipulim, pa asnjë përjashtim”, ka përfunduar ai.
