Futbollisti i Kombëtares së Kosovës, Zymer Bytyqi është pezulluar nga ekipi i parë i CSKA Sofjes.
Klubi bullgar, të martën ka publikuar vendimin në lidhje me Bytyqin, të cilin e ka degraduar për shkak të thyerjes së rregullave disiplinore.
Në njoftim, CSKA ka bërë të ditur se Bytyqi do të stërvitet me ekipin e dytë dhe ka shtuar se rregullat disiplinore vlejnë për të gjithë futbollistët, të cilët janë të obliguar ti zbatojnë.
“Lojtari ofensiv, Zymer Bytyqi do të stërvitet me ekipin e dytë të CSKA-së. Vendimi u mor nga trajneri Dusan Kerkez për shkak të shkeljes së disiplinores dhe sjelljes që është e papajtueshme me standardet profesionale dhe rendin e brendshëm të klubit”, ka shkruar CSKA.
28-vjeçari verën e shkuar iu bashkua ekipit bullgar, me të cilin ka kontratë deri në vitin 2026 dhe opsionin e vazhdimit për një vit tjetër.
“CSKA gjithmonë ka mbështetur parimet e përgjegjësisë, respektit dhe frymës së ekipit. Kushdo që vesh fanellën e kuqe është i detyruar t’i zbatojë ato”, thuhet në njoftim.
Para CSKA-së, Bytyqi ka luajtur edhe te Antalyaspori, Olympiacosi, Konyaspori, Vikingu, Salzburgu e Sandnesi.
Ai ka 24 paraqitje me Kombëtaren e Kosovës dhe 1 gol të shënuar.
