Profesori, Seb Bytyqi, ka deklaruar se shpesh gabimisht barazohet Lista Serbe me komunitetin serb në Kosovë, gjë që sipas tij është e pasaktë.
Bytyçi thotë se Lista Serbe si parti ka dëmtuar pluralizmin në komunitetin serb. Sipas tij anëtarët e Listës Serbe që nuk janë të përfshirë në krime mund të krijojnë një subjekt tjetër politik, mirëpo vetë kjo parti, me historikun dhe veprimtarinë e saj, sipas tij, i ka plotësuar kushtet për t’u ç’regjistruar.
“Gabimisht barazohet Lista Serbe me komunitetin serb. Një parti nuk mund të barazohet me një komunitet, sepse vetë Lista Serbe e dëmtuar pluralizmin në komunitetin serb edhe këtë gjë e ka konkluduar edhe vetë misioni i mbikëqyrjes së zgjedhjeve nga BE. Pra, deklaratat e përfaqësuesve të BE-së janë në kundërshtim me gjetjet e misionit të BE-së për mbikëqyrjen së zgjedhjeve dhe dëshmitë dita ditës që kjo parti punon kundër rendit Kushtetues të Republikës së Kosovës dhe nuk duhet të ekzistojë si parti e regjistruar. Njerëzit që nuk janë të përfshirë në krime që janë anëtarë të Listës Serbe, ata mund të formojnë parti tjetër. Mirëpo, kjo parti me këtë formë dhe me bagazhin e saj që e ka është dëshmuar që i plotëson kushtet që të ç’regjistrohet”, tha ai në emisionin “Info Nata” në Tëvë1.
