Përmes një postimi në Facebook, Bytyqi ka njoftuar se falë trajtimit klinik dhe terapive të reja, numri i të mbijetuarave nga kanceri i gjirit, është trefishuar në 60 vitet e fundit.
Teksa shtoi se në Klinikën e Onkologjisë në QKUK, ende nuk ka statistika për të treguar se sa pacientë e humbin betejën me kancer brenda vitit.
“Ky muaj, nga fillimi e deri në fund është inkurajim për të gjithë qytetarët, organizatat, bizneset e grupet tjera që të bashkohen në aktivitete për të rritur ndërgjegjësimin për të kontrolluar dhe parandaluar kancerin e gjirit. Siç e dimë dhe shumë familje e kanë përjetuar, kanceri i gjirit mund të shkatërrojë jetë përgjithmonë. Megjithëse në Klinikën e Onkologjisë në QKUK nuk kam parë ende statistika se sa pacientë humbin betejën me kancer brenda vitit, një nga rastet më të shpeshta të vdekjeve sipas të dhënave nga Organizata Botërore e Shëndetësisë është pikërisht kanceri i gjirit. 1 në 8 gra mund të preken nga kanceri i gjirit gjatë jetës së tyre. Falë trajtimit klinik dhe zbulimin e terapive të reja, numri i të mbijetuarave nga kanceri i gjirit është trefishuar në 60 vitet e fundit”, ka shkruar Bytyqi.
Sipas saj, kjo çështje ka rëndësi më shumë se ndonjë parti e politikë, teksa shtoi se diagnoza e kancerit të gjirit është një luftë me të cilën secila grua duhet të përballet vetëm.
“Kjo shami që po mbaj me vete dhe që të njejtën ua dhashë secilës grua deputete këtu në sallë, shënon një simbolikë të muajit ku thirrjet më të mëdha u bëhen po grave, por jo vetëm, për të bërë ekzaminim klinik të gjirit/mamografinë”, ka shkruar tutje.
Po ashtu, Bytyqi ka inkurajuar të gjitha nënat, motrat e vajzat të cilat janë pjesë e shoqërisë tonë, duke u thënë se secila nga to vlen dhe secila histori e tyre është frymëzim për të gjithë.