Deputeti i Partisë Guxo, Viktor Buzhala, ka vlerësuar se vendimi i Gjykatës Kushtetuese për nënkryetarin e pestë të Kuvendit nga rradhët e komunitetit serb mbron interesat e Listës Serbe dhe jo të komunitetit që ajo përfaqëson.
Buzhala ka thënë se ky vendim i jep Listës Serbe mundësi për të bërë lojëra të ndryshme në Kuvend, në dëm të Kosovës, dhe mund të shkaktojë bllokadë institucionale ose imponim të vullnetit të deputetëve.
“Nuk mendoj se ky vendim e mbron komunitetin serb, por Listën Serbe. Ky vendim i jep veto Listës Serbe, që pastaj mund të luajë dhe të bëjë lojëra të ndryshme në Kuvend. Lista Serbe nuk ka qëllim të mirë me këtë vendim, pasi gjithmonë ka vepruar në dëm të vendit. Vendimi në njëfarë mënyre ua imponon vullnetin e deputetëve të Kuvendit të Kosovës për të zgjedhur një emër të caktuar. Për shembull, nëse asnjëri nga 9 deputetët e Listës Serbe nuk dëshiron ta votojë kandidatin dhe nuk mblidhen 61 vota, vullneti i deputetëve nuk guxon të bllokohet. Në praktikë, vendimi mund të çojë në bllokadë ose në imponim të votës, ndërsa deputetët duhet të kenë lirinë e votimit,” ka thënë ai në emisionin “Këndi i Debatit” në Tëvë1.
Buzhala ka vlerësuar gjithashtu se deputeti Nenad Rashiq, për dallim nga Lista Serbe, ka qenë konstruktiv dhe ka respektuar institucionet e Kosovës.
“Nenad Rashiq është treguar konstruktiv, njeh institucionet e Kosovës dhe është në frymën e ndërtimit dhe funksionimit të tyre, por kjo nuk vlen për Listën Serbe. Padiskutim, Gjykata Kushtetuese do të duhej të kishte marrë parasysh nëse me vendimin e saj po mbrohen interesat e komunitetit serb apo të Listës Serbe, dhe unë mendoj se është kjo e dyta,” ka përfunduar ai./teve1.info/
