Vetëm disa metra larg shtëpisë së tij gjendet liqeni i cili furnizon me ujë të pijshëm Podujevën e një pjesë të Prishtinës.
Por edhe pse shtëpinë e ka buzë liqenit, Ymer Bajrami, nga fshati Orllan i Podujevës, ujin e Batllavës nuk mund ta përdorë për pije.
Kjo pasi ai dhe disa shtëpi të tjera në këtë fshat nuk janë të furnizuar me sistemin e ujësjellsit.
Për këtë, Bajrami detyrohet që ujin për pije çdo ditë ta nxjerrë në këtë formë.
“Baba qe ka rrnu këtu në vitin 1928, ka vdekë e nuk ka pas ujë kurrë këta e din gjithë Orllani e deri tash nuk e kanë pru kurrë. Në vitin 2021-22 e kanë sjellë ujësjellësin por më siguri i kanë ngjitë gypat e këqij e ka dështuar”, tha Ymer Bajrami, banor në fshatin Orllan.
E për shkak të problemit me ujë të pijshëm, në këtë fshat jetojnë vetëm disa familje.
Për këtë, Bajrami thotë se nuk po mund as të organizojnë ndonjë protestë.
“Ne jemi këtu një 10-15 familje që rijmë verë e dimër, tjerët bashkëfshatarë, kanë shpija në Bardhosh, Podujevë atyre nuk iu intereson shumë për ujë, sa me bo ndonjë protestë të fortë. Edhe kur u ankojshim njerëzit bënin hajgare qysh 100 metra liqenin afër e ujë nuk keni”, tha Bajrami.
Nga Komuna e Podujevës, thonë se projekti ka nisur në vitin 2019, por kompania e cila ka fituar tenderin e ka lënë në gjysmë punë.
Zëdhënësi i Komunës ka deklaruar se këtë kontratë e menaxhon KRU Prishtina.
“Ka qenë një projekt i nënshkruar në vitin 2019, një kontratë e nënshkruar ndërmjet Komunës së Podujevës dhe Kompanisë së Ujësjellësit Prishtina,dhe Ministrisë së Mjedisit, ajo ka mbetur në gjysme pasi operator ekonomik që ka qenë duke zhvilluar punimet nuk i ka përfunduar të gjitha punimet nga viti 2021 i ka ndërprerë punimet dhe ne vazhdimisht edhe përmes KRU PRISHTINA edhe përmes Ministrisë kemi dorëzuar letra dhe kemi bërë kërkesa që të vazhdohen punimet”, tha zëdhënësi i Komunës së Poduejvës, Fatri Zhitia.
Nga Kompania rajonale e ujësjellësit bëjnë më dije se së shpejti do të punohet që këtyre banorëve të iu dërgohet uji.
“Ne ende zyrtarisht nuk e kemi marrë në menaxhim, e kemi formuar një ekip, se kjo është një zonë e re për neve, që do të punojë enkas me këtë fshat. Sa përket furnizimit me ujë në fshatin Orllan, pjesa dërmuese kanë furnizim me ujë, por janë në disa rrugica, aty ku banorët janë kyçur vetë përmes pusetave pa na pyetur neve si ujësjellës”, tha zëdhënësi i KRU “Prishtina”, Arjeta Mjeku.
Në vitin 2019, ministri i atëhershëm i Ministrisë së Mjedisit, Fatmir Matoshi kishte nënshkruar kontratë në vlerë mbi 900 mijë euro për ndërtimin e sistemit të ujësjellësit në fshatin Orllan.
