Tri javë më parë dyshohet se u përleshën fizikisht.
E nga dhuna e ushtruar, tre anëtarë të një familjeje në Shtime pësuan lëndime trupore.
Me të marrë ndihmën e parë në Qendrën e Mjekësisë Familjare në Shtime, për tretman të mëtutjeshëm mjekësor u dërguan në Ferizaj e më pastaj në Qendrën Klinike Universitare në Prishtinë.
Në mesin e tyre ishte D.K, të cilit iu përkeqësua gjendja shëndetësore.
“Ka ndodhë koxha moti, e kemi pranu në emergjencë e më pas ka dalë në intensiv”, ka thënë Naser Syla, drejtor në emergjencën e QKUK-së.
Mirëpo nga lëndimet e rënda trupore, këtë të shtunë ai humbi jetën.
E rasti u konfirmua nga Policia e Kosovës.
“Viktima mashkull kosovar kishte pësuar lëndime trupore dhe deri më tani kishte qenë në QKUK në tretman mjekësor. Më datë 08.06.2024 nga QKUK është konfirmuar se viktima ka ndërruar jetë”, thuhet nga policia.
Nga Policia bënë të ditur se me vendim të prokurorit, trupi i pajetë do dërgohet në Institutin e Mjekësisë Ligjore për obduksion, ndërsa i dyshuari mashkull kosovar-djali i viktimës është arrestuar dhe pas intervistimit është dërguar në qendrën e mbajtjes.
Ekipi i televizionit ka qëndruar të dielën tek shtëpia e familjes të së ndjerit por që të njëjtit nuk pranuan të flasin para kamerës.