Punuan gjatë së bashku në vendin e njëjtë të punës.
Isa e Mejreme Dili që ishin bashkëshortë u angazhuan për më shumë se 20 vite në Policinë e Kosovës.
E të shtunën, në të njëjtën ditë të dy ata dolën në pension për çka edhe u mblodhën kolegët e tyre nga Stacioni Policor në Viti.
Dy ish-zyrtarëve iu ndanë mirënjohje dhe certifikata për punën e tyre nga Komandanti i Policisë, Afrim Halili por edhe përfaqësues nga Komuna e Vitisë dhe institucione tjera.
Rreshteri në pension që punoi për afro 50 vite në profesionin e Policit, thotë se rrugëtimi nuk ishte i lehtë, por edhe prezenca e gruas së tij në vendin e punës ndikoi pozitivisht.
“Kam pasur edhe të mira edhe të këqija edhe sfida por kam kaluar mirë i falënderoj komunitetin e Vitisë që më kanë respeketu edhe i kam respektu, kam dhënë ndihmë sa kam mundur sa më ka taku përmes ligjit… Ka qenë ndjenjë e mirë edhe kom pas sikur edhe kolege edhe bashkëshorte e kam pas në krahë gjithmonë kam pas bashkëpunim me të dhe e kemi ndarë edhe të mirat edhe të këqijat, ndihmë ka kërkuar edhe kjo prej meje edhe unë prej saj”, shprehet ai për Tëvë1
E Mejremja që është policja e parë në këtë qytet që pensionohet në moshën 65-vjeçare, tregon se ka qenë ëndërr e saj punësimi në Policinë e Kosovës.
“Edhe ne nuk jemi kursyer, vazhdimisht gjatë gjithë kohës aty ku ka pasë nevojë të shkojmë të kontribuojmë kemi dhënë max sa kemi pas mundësi dhe kushte e kam dashtë këtë punë edhe e kam arrit, tash po dal në pension jam e kënaqur edhe me këtë se kjo është pjesë e jetës deshte s’deshte të vjen koha”, thotë ajo.
Derisa eprori i deritanishëm i tyre, thotë se do t’i mungojnë stacionit dy ish-zyrtarët, por që gjithmonë do të kërkojnë edhe këshilla nga përvoja e tyre profesionale.
“Këta janë dy bashkëshort të cilët rastësisht dalin për një ditë në pension edhe të cilët kanë shërbyer më se 20 vite në Viti në policinë e pasluftës, kanë qenë të dytë shembullorë kanë qenë kolegë të mirë … Patjetër se do ta shfrytëzojmë përvojën e tyre sepse në tash po pajisemi me policë të rinj të cilët kanë nevojë edhe ne gjithmonë kemi nevojë për përvojat të cilat në i ndajmë, i kemi ndarë dhe do t’i ndajmë edhe pas pensionimit”, thotë Afrim Halili – Komandant i Stacionit Policor në Viti.
Festa për pensionim e këtij çifti vazhdoi gjatë orëve të mbrëmjes ku ishin mbledhur shumë zyrtarë policorë që ishin pjesë e rrugëtimit profesional të tyre.
