Analisti politik, Blerim Burjani mendon se një qeveri stabile për Kosovën do të ishte një qeveri e përbërë nga Lëvizja Vetëvendosje, Partia Demokratike e Kosovës si dhe nga Lidhja Demokratike e Kosovës.
Burjani në emisionin ” Ditari” në Tëvë1 ka thënë se një qeveri e tillë do të krijonte stabilitet dhe do të zgjidhte problemin e Kosovës me Asociacionin.
“Idealja për të krijuar një qeveri stabile do të ishte një qeveri e përbërë nga tre subjektet politike LVV, PDK dhe LDK për të krijuar stabilitet dhe për zgjidhjen e problemeve që ka Kosova me Asociacionin”, ka thënë ai.
Sipas tij një zgjidhje tjetër nëse Kurti dëshiron të krijojë stabilitet do të ishte që ai të bëhet president i vendit pas përfundimit të mandatit të Vjosa Osmanit si presidente.
“Nëse partitë tjera nuk e duan Kurtin kryeministër atëhere unë kam thënë nëse këtu ka probleme dhe Kurti pajtohet të bëhet president i shtetit pse jo? Le të bëhet president do të thotë në momentet kur Vjosa Osmani shkon nga kjo pozitë dhe aty me marrëveshje politike mund të ndodhë nëse Kurti dëshiron të krijojë stabilitet mirëpo inati i madh që ka Kurti është shumë e vështirë për të paragjykuar ose për të menduar që ai e bën këtë”, ka shtuar Burjani.
