Deputetja e LDK-së, Valentina Bunjaku-Rexhepi ka folur për faktin që BQK vazhdon të mos e ketë Guvernatorin e saj dhe udhëhiqet nga një Ushtrues Detyre.
Sipas saj, kjo është tendencë e partisë në pushtet që ta kapë edhe këtë institucion sikurse edhe institucionet e tjera të pavarura.
“Kjo është një tendencë për me e kapë edhe Bankën Qendrore sikurse të gjitha institucionet tjera, sepse kanë pas kohë me i intervistu, ka qenë komisioni me i sjell emrat. Nuk e di se s’jam pjesë e atij komisioni realisht, s’po du me hy në detaje mirëpo kjo është tendencë e kapjes së Bankës Qendrore sikurse që po duan me e kapë Këshillin Prokurorial, apo po e kritikojnë Gjykatën Kushtetuese sepse s’po u shkon për shtati, sikurse që e kanë kap policinë edhe të gjitha institucionet tjera”, ka thënë Bunjaku-Rexhepi në Ditari në Tëvë 1.
“Kanë tendencë për me i kapë. Sigurisht që ky është qëllimi me e kapë edhe këtë institucion, realisht unë e di që e ka pasë performancën jashtëzakonisht të mirë si Bankë Qendrore dhe në këtë rast tendenca e tyre është me e kapë edhe këtë institucion”.
Sipas deputetes, kryeministri Kurti funksionon me trurin e diktatorit.
“Edhe sinqerisht kjo është e papranueshme sepse ne jemi t’u jetu me një shtet demokratik. Kjo është dikaturë. E kam thënë këtë para shumë kohësh, po e them prapë: Zoti Kurti funksionon me logjikën e diktatorit, me trunin e diktatorit. Nuk mundesh gjithçka me diktu në Republikën tonë. Sepse janë institucione të pavarura që nuk duhet me ndiku politika”, ka shtuar ajo.