Kombëtarja U19 e Kosovës në futboll, ka nisur punën me selektorin e ri, Albert Bunjaku ka bërë të ditur Federata e Futbollit të Kosovës (FFK), të martën.
“Dardanët” e rinj kanë mbajtur stërvitjen e parë nën urdhrat e Bunjakut në kampin nacional të FFK-së, në Hajvali.
Ky grumbullim do të zgjasë tri ditë, ndërsa në këtë kamp janë ftuar vetëm lojtarët vendas, pra që luajnë në Kosovë.
Për Bunjakun, i cili muaj më parë u emërua selektor i Kosovës U19, ky është kampi dhe stërvitjet e para me lojtarët e rinj të Kosovës.
Bunjaku në postin e selektorit të Kosovës U19, ka zëvendësuar Adil Maliqin e larguar.
