Kryetari i Komunës së Podujevës, Shpejtim Bulliqi, në emisionin “Info Nata”, ka listuar disa nga projektet që janë duke realizuar në këtë komunë.
Bulliqi, ka thënë se është duke u punuar mirë, derisa ka treguar edhe për projektet që do të realizohen të cilat sipas tij kapin shifrat milionëshe.
“Podujeva 21 vite ka pasur qeverisje lokale, 21 vite e kanë ruajtur një barak, po bëjmë një stacion të autobusëve, vlera e të cilit kalon shifrën prej 1.2 milion euro. Një bashkëfinancim mes pushtetit lokal, Ministrisë së Zhvillimit Rajonal edhe Ministrisë së Infrastrukturës, po e bëjmë ndërtimin me urgjencë të qytetit të Podujevës në vlerë të 1.7 milion euro, 1.1 milion euro janë donacion nga Katari si shenjë e bashkëpunimit të mirë me organizatat ndërkombëtare, 600 mijë euro jemi duke e financuar ne si qeverisja lokale”, tha i pari i Podujevës.
Bulliqi, tha po ashtu se kanë filluar me procedura të shpronësimit të hapësirave publike.
“Kemi filluar me të gjitha procedurat e nevojshme për shpronësimin e hapësirës për parkun industrial të parkut të qytetit të Podujevës. Pas 21 viteve po bëhen këto me qeverisjen e VV-së, një sipërfaqe prej 37.2 hektarë që është shpronësuar tashmë dhe komuna ka ndarë një shumë përafërsisht një milion euro, që do të paguaj për këtë shpronësim, ku do të ndahen diku rreth 49 parcela, për bizneset potenciale që kanë interes të vijnë në komunën tonë. Jemi duke ndërtuar dy shkolla sot nënshkrova kontratën e shkollës së tretë, gjithashtu jemi duke i ndërtuar dy salla të sporteve në shkollat fillore dhe të mesme. Po ashtu këtë vit do të fillojmë me ndërtimin e çerdhes për fëmijë, kemi hapur çerdhen e dytë publike, 21 vite një çerdhe veç kemi pasur”, tha ai.
Bulliqi tha se këto janë projekte milionëshe të cilat sipas tij po bëhen për një afat kohor prej 1 viti e shtatë muajsh.
Por kryetari i degës së Lidhjes Demokratike në Podujevë, Ekrem Hyeni, tha se këto mund të jenë plane të fushatës elektorale, por jo punë që po kryhen në terren.
“Të krijohet përshtypja se këtu nuk kemi një kryetar komune, por kemi një person në fushatë elektorale, i cili lexon programin, dhe këto të gjitha që i tha janë dëshira”, tha Hyseni.
Gjithashtu, Hyseni ka bërë të ditur se kanë dorëzuar padi në Prokurori për një drejtori të Komunës së Podujevë.
“Dega e LDK-së në Podujevë ka dorëzuar padi për një drejtori në Prokurori, dhe Prokuroria sot ka kërkuar sqarime shtesë, i ka evidentuar shkeljet. Po e presim procesin”, tha ai.
Ndërkohë, për këtë Bulliqi ka thënë se partia e LDK-së merren me konspiracione, derisa Hyseni ka thënë se merren me ata të cilët e shkelin ligjin. /teve1.info/
