Kryetari i Organizatës për Siguri dhe Bashkëpunim në Evropë (OSBE) Bujar Osmani tha se propozimi i tij për deeskalim dhe normalizim të situatës në veri të Kosovës u është dorëzuar misioneve në Beograd dhe Prishtinë.
Osmani tha se palët duhet të komunikojnë dhe funksionalizojnë atë.
Ai tha se “Plani me nëntë hapa”, të cilin e bëri publik gjatë fundjavës, “nuk është plan i OSBE-së, sepse ajo organizatë ndërkombëtare i merr vendimet me konsensus, por nga Republika e Maqedonisë së Veriut dhe ai si kryetar i OSBE-së”.
“Roli im si kryetar i OSBE-së është të ofroj një zgjidhje për de-përshkallëzimin. OSBE është në thelb një platformë për dialogun, komunikimin dhe menaxhimin e konflikteve. Ne kemi dy operacione të mëdha, njërën në Prishtinë dhe tjetrën në Bograd”, tha Osmani në një intervistë për Televizionin maqedonas Telma, transmeton teve1.info.
Ai shtoi se propozimi i tij është një nga përpjekjet plotësuese me organizatat dhe organet e tjera ndërkombëtare për të de-përshkallëzuar dhe normalizuar situatën (në veri të Kosovës) dhe që palët (Beogradi dhe Prishtina) “t’i rikthehen dialogut që u arrit në Ohër”.
“Pra, ne kemi një detyrim shtesë, jo vetëm si kryetar i OSBE-së, por edhe si vend ku është arritur ajo marrëveshje. Ju mund të shihni që masat e propozuara janë të ngjashme me masat e ofruara nga organizatat e tjera ndërkombëtare. Kjo do të thotë se Bashkësia ndërkombëtare është në unison në kërkesën që palët t’i kthehen dialogut dhe t’i zbatojnë obligimet nga marrëveshja themelore dhe aneksi, përkatësisht Marrëveshja e Ohrit”, tha Osmani.
Kryetari i OSBE-së dhe Ministri i Punëve të Jashtme të Maqedonisë së Veriut, Bujar Osmani, dy ditë më parë shpalli “Planin me nëntë hapa për deeskalimin dhe normalizimin e situatës në veri të Kosovës”.
Ai plan, siç njoftoi ministria e tij, “ka për qëllim arritjen e paqes dhe stabilitetit të përhershëm në veri të Kosovës dhe kthimin e serbëve të Kosovës në institucione dhe procese demokratike”.
