Kandidati i PDK-së për kryetar të Lipjanit, Shukri Buja, ka komentuar vendimin e Gjykatës lidhur me rastin e njohur si “Veteranët”, ku ai është shpallur fajtor, si dhe ndikimin e këtij vendimi në kandidimin e tij për zgjedhjet lokale në këtë komunë.
Në emisionin “Mesditë” në Tëvë1, Buja tha se e respekton vendimin e gjykatës, pavarësisht se e konsideron të padrejtë dhe jo përfundimtar.
“Unë kam qenë gjithmonë respektues i ligjeve. E kam thënë edhe në deklarimin tim publik se e respektoj edhe vendimin, edhe kur është i padrejtë. Ky është një dënim që nuk është vendim i formës së prerë”, deklaroi Buja.
Ai sqaroi se, përkundër këtij vendimi, kandidimi i tij është i ligjshëm dhe nuk bie ndesh me Ligjin për Zgjedhjet apo atë për Qeverisjen Lokale.
“Nëse do të ishte vendim i formës së prerë, nuk do të më lejohej kandidimi. Por nuk është, sepse Gjykata e Apelit duhet ta marrë atë vendim”, theksoi ai.
Buja po ashtu u pyet nëse ky rast do të ndikojë në garën për kryetar të Lipjanit. Ai e quajti vendimin politik dhe theksoi se qytetarët e kuptojnë lojën politike pas tij.
“Realisht, nuk ndikon në fitimin e Lipjanit. Njerëzit kur i shohin këto si skema politike… Edhe pse kam pasur të drejtë të kandidoj në këto 10 vite, menjëherë pas vendimit për të kandiduar vjen dënimi, i cili për neve është politik”, u shpreh Buja.
Ai mbetet i bindur se qytetarët do ta vlerësojnë punën e tij dhe do ta mbështesin në garën për udhëheqjen e komunës së Lipjanit.
