Kandidati i PDK-së për kryetar të Lipjanit, Shukri Buja, ka reaguar pas vendimit të trupit gjykues të Gjykatës Themelore të Dhomave të Specializuara, e cila rrëzoi kërkesën e mbrojtjes së Hashim Thaçit, Rexhep Selimit, Kadri Veselit dhe Jakup Krasniqit për heqjen nga aktakuza të incidenteve që sipas tyre binin jashtë periudhës së konfliktit të armatosur.
Buja ka thënë se ky është një vendim i pritur, por njëkohësisht i dëmshëm dhe politik.
Sipas Bujës, Specialja është gjykatë etnike, e cila do ta dëmtojë imazhin e Kosovës.
“Përveç mendjes, unë e kam edhe zemrën atje. Ka qenë një vendim që është pritur deri diku, sepse ky gjykim po vazhdon. Nuk është ngritur kjo aktakuzë për t’u ndërprerë në gjysmë – do të vazhdojë ky gjykim, që unë gjithmonë e kam quajtur gjykatë politike. Tash po shihet se është edhe etnike dhe kjo do ta dëmtojë shumë imazhin e Kosovës, në rast se vazhdon në këtë formë,” deklaroi ai.
Buja kritikoi institucionet shtetërore dhe shoqërinë për mosangazhim të mjaftueshëm në mbrojtjen e luftës së Ushtrisë Çlirimtare të Kosovës.
“Pak jemi duke bërë si individë, si shoqëri, si qeveri, si institucione të shtetit për ta mbrojtur luftën e Ushtrisë Çlirimtare. Bashkëluftëtarët e mi që janë atje, nuk janë vetëm individë me emra të përveçëm – ata përfaqësojnë të gjithë luftën e UÇK-së, mbi të cilën është shpallur shteti ynë”, tha ai.
Buja, i cili së fundi është dënuar me një vit burgim në rastin e veteranëve, theksoi se edhe ky vendim ishte politik dhe i pabazë.
“Duhet të jemi më të kujdesshëm, të punojmë më shumë që ata t’i kemi në shtëpi, jo vetëm për familjet e tyre, por për shkak të vetë shtetit dhe historisë sonë të lavdishme”, përfundoi ai./teve1.info/
