Njohësi i çështjeve të Ballkanit Perëndimor, Janusz Bugajski ka shkruar se Washingtoni dhe Brukseli po ndezin një tjetër fitil ballkanik duke ushtruar presion mbi Prishtinën për të krijuar një Asociacion të Komunave me shumicë Serbe (AKS).
Ai ka thënë se edhe pse Asociacioni po thuhet që nuk cenon Kushtetutën e Kosovës, në praktikë sipas tij kjo mund të ketë pasoja negative.
Bugajski në një opinion për The Geopost, ka thënë se një marrëveshje pa njohje reciproke është një mundësi për konflikt.
“Washingtoni dhe Brukseli po ndezin një tjetër fitil ballkanik duke ushtruar presion mbi Prishtinën për të krijuar një Asociacion të Komunave me shumicë Serbe (AKS). Edhe pse ithtarët e AKS-së pretendojnë se ajo nuk do të cenojë Kushtetutën e Kosovës dhe as nuk do të kërcënojë pavarësinë e saj dhe institucionet demokratike, në praktikë ajo mund të ketë pasoja serioze negative si në vend ashtu edhe në rajon. Çdo marrëveshje e bazuar kryesisht në përkatësinë etnike në të cilën shteti fqinj nuk e njeh pavarësinë e Kosovës është një recetë për konflikt”, ka shkruar ai në këtë opinion.
BE por sidomos SHBA ka bërë thirrje që Asociacioni të formohet sa më parë.
I dërguari i SHBA-së për Ballkanin Perëndimor, Gabirel Escobar, ka përsëritur se Asociacioni duhet të bëhet. Ai duke folur për kundërshtimet që ka kryeministri Kurti ka thënë se ai nuk është çështje e një individi por është çështje mes Kosovës dhe Serbisë.
ShBA ka dhënë garancia se Asociacioni nuk do të cenojë Kushtetutën dhe sovranitetin e Kosovës.
