Në njoftimin për media nga BSPK-ja kanë bërë të ditur se ata kërkojnë rritjen e pagave të punonjësve në sektorin publik për 100 euro.
Sipas njoftimit, kjo protestë do të nis nesër në orën 12:00 para objektit të Qeverisë.
“Informojmë qytetarët, që nesër, e premte, më 8 prill 2022, në organizimin e Bashkimit të Sindikatave të Pavarura të Kosovës, e në udhëheqjen e Kryetarit të BSPK-së, Atdhe Hykolli, mbahet Protesta e paralajmëruar e Federatave dhe Shoqatave Sindikale. Protesta do të niset në orën 12:00 nga Biblioteka Kombëtare dhe do të vazhdojë drejt rrugës Agim Ramadani poshtë rrugës Eqrem Çabej në drejtim të rrugës Xhorxh Bush e nëpërmes Sheshit Zahir Pajaziti për tu ndalur në Sheshin Skënderbeu para ndërtesës së Qeverisë së Republikës së Kosovës”, thuhet në njoftim.
Po ashtu, kërkesë tjetër e BSPK-së është edhe fillimi i zbatimit të Ligjit për Sigurimin Shëndetësor.
“1. Miratimi i Ligjit të Pagave sa më shpejt që është e mundur dhe fillimi i zbatimit të tij e deri në fillim të zbatimit rritja e pagave për 100 euro për të gjithë të punësuarit që marrin paga nga buxheti i Kosovës. 2. Fillimi i zbatimit të Ligjit për Sigurimin Shëndetësor. 3. Plotësim-ndryshimi i Ligjit për Skemat Pensionale të Financuara nga Shteti, nr. 04/L-131, sidomos të ndryshohet te neni 8, paragrafi 1 e nënparagrafët 1.2 dhe 1.3, që thirret në Ligjin e Sigurisë Pensionale të vitit 1983, pra sipas të cilit kërkohet që të ketë 15 vjet kontribut në skemat pensionale para datës 01.01.1999”, thuhet më tej në njoftim. /teve1.info/
