Brukseli kërkon një kompromis nga Prishtina e Beogradi, që të normalizohen marrëdhëniet mes dyja palëve.
Megjithatë këtë vit akoma nuk është zhvilluar një takim i nivelit të lartë mes dyja delegacioneve.
Për më tepër Bashkimi Evropian ende nuk e ka një datë se kur palët do të ulen në tavolinën e bisedimeve.
Në një përgjigje për Tëvë1, zëdhënësi i Bashkimit Evropian, Peter Stano thotë se takimi i radhës do të mbahet kur të krijohen kushtet e përshtatshme, duke mos përmendur se cilat tema do të diskutohen.
Profesori nga Oxford University, Richard Caplan, thotë se Brukseli po pret që në këtë fazë Prishtina të dalë me propozime për asociacionin.
“Një nga pengesat në dialog është refuzimi i Prishtinës për të mbështetur Asociacionin e Komunave Serbe. Brukseli dëshiron që Prishtina të dalë me propozime për Asociacionin. Megjithatë palët ende duken larg marrëveshjes finale”, tha Caplan.
Sipas Caplan, Serbia ka bërë progres të madh sa i përket anëtarësimit në Bashkimin Evropian, por e gjitha kjo do të varet nga normalizimi i marrëdhënieve me Kosovën.
“Serbia ka bërë një hap më pranë anëtarësimit në BE me hapjen e bisedimeve për politikat mjedisore. Megjithatë, BE-ja e ka bërë të qartë se përparimi drejt anëtarësimit në BE ende varet nga normalizimi i marrëdhënieve të Serbisë me Kosovën. BE-ja është e shqetësuar për ndikimin e ngjarjeve në Ukrainë për Ballkanin Perëndimor, veçanërisht ndikimin ekonomik dhe po merr disa masa për të ofruar ndihmë për rajonin”, shtoi ai.
Për më shumë 10 vjet dialog, Kosova dhe Serbia kanë nënshkruar së paku 33 marrëveshje, për të cilat të dyja palët akuzojnë njëra tjetrën për moszbatim.
