Ligji për arsim dhe aftësim për të rritur iu jep mundësi personave mbi moshën 15 vjeçare të vijojnë këtë lloj të mësimit. Sipas njohësve të arsimit dhe drejtorit të Qendrës së Kompetencës “Shtjefën Gjeçovi” në Prishtinë kjo është një mundësi e mirë, për ata që duan të vazhdojnë mësimin që për shkaqe të ndryshme e kanë lënë në gjysme. Edhe vet njëri nga nxënësit shprehet i kënaqur më këtë lloj mësimi.
Është ora e katërt që po e mbanë.
Kështu duket klasa ku nxënësi Leonard Gashi po ndjek praktikën në Qendrën e Kompetencës “Shtjefën Gjeçovi” në Prishtinë.
Gashi, po ndjek praktikën në drejtimin Instalim ujësjellës kanalizim ngrohje dhe klimatizim.
Ai shprehet i kënaqur për drejtimin që po e ndjekë.
Madje ka dhe një mesazh për ata që duan të ndjekin shembullin e tij.
“Ky mësim është i mirë për ata që janë pak më të rinj. Për të marrë pak angazhim nga puna reale, dhe është gjë e mirë,trajnim për eksperience për të shkuar dhe me ndjek një profesion real”, shprehet Lenoard Dragusha, nxënës.
Drejtori i Qendrës si problem të vogël e konsideron përqindjen e nxënësve që ndërprenë mësimin në klasën e 12.
“Për shkollën që po na krijojnë një hendikep pak është se klasat e dymbëdhjeta gjegjësisht maturantët po e vërejnë që ekziston edhe kjo mundësi edhe po gjejnë punësim domethënë po gjejnë punë, vend të punës edhe tash normalisht lakmia për të pasur një pagë. Atëherë një pjesë një përqindje 5 deri në 10% e ndërprenë mësimin në klasën e 12 në mënyrë që të vazhdojnë pas andej me provime për arsim për të rritur”, thotë Blerim Gërvalla, drejtori i Qendres “Shtjefën Gjeçovi”.
E koordinatori i kësaj shkolle Avni Emini, tregon se si funksion ky mësim dhe kush ka të drejtë të aplikojë.
“Të drejtë kanë të gjithë kandidatët mbi moshën 17 vjeçare, dhe kandidatë që nuk e plotësojnë kushtin e moshës 17 vjeçare, me pëlqim të prindit dhe me ndonjë dokument ose ndonjë dëshmi mjekësore ose familjare që s’mundet me ndjekë mësimin e rregullt kanë të drejtë më u regjistrua. Janë dy afate brenda vitit, me ligj parashihen dy afate. Mësimi është më i përshpejtuar se të mësimi i rregullt, brenda viti kanë mundësi dy vite me i përfunduar”, shprehet Emini.
Madje Emini tregoi edhe çmimet se sa duhet paguar një person që dëshiron të ndjeke këtë lloj mësimi.
Pagesa për vitin e parë është 150 euro, për vitin e dytë 100 euro regjistrimi 50 praktika dhe 50 çertifikata.
Sipas njohësit të arsimit Rinor Qehaja, efikasiteti i një vlerësimi të tillë është në një pikëpyetje të madhe.
“Efikasiteti i një vlerësimi të tillë është në një pikëpyetje të madhe. Mirëpo përderisa legjislacioni njeh kontekste të ndryshme dhe situata të ndryshme që të rriturit mund të kalojnë, që ia kanë cenuar ndjekjen e rregullt të procesit mësimorë, atëherë kjo është një mundësi e mirë për ata që të rikthehen dhe përmes provimeve të marrin certifikimin e duhur për shkollë të mesme të lartë, vlerëson Qehaja.
Qendra e Kompetencës “ Shtjefën Gjeçovi”, në Prishtinë momentalisht ka rreth 100 nxënës të regjistruar në arsim dhe aftësim për të rritur.
