Të martën është shënuar dita ndërkombëtare e të drejtave të njeriut. E sipas avokatit të popullit jo çdo herë qytetarët arrijnë të i dinë të drejtat që ata kanë. Kurse nga KMDLNj thonë se nuk ka arsye për të u festuar kjo ditë në Kosovë sepse është shumë prapa plotësimit të standardëve për të drejtat e njeriut.
Tash e sa vite Blerina Zogaj kujdeset për të birin e saj.
Kjo për faktin se Leart Zogaj, është me aftësi të kufizuara.
E si pasojë e shkeljeve të të drejtave të Leartit, ajo detyrohet të luaj edhe asistenten për të.
“Të ju njihet e drejta e pensioneve sa ju takon jo si rasti i Leartit,se Learti i takon kategorisë së parë e kanë vë ne të dytën dhe e merr një pension prej 150 eurosh. Leartit i takon edhe kujdestaria, për fat të keq nuk është bë vlerësimi i drejtë dhe Leartit ia kanë mohuar këtë të drejtë”, ka deklaruar Blerina Zogaj –nëna e Leartit.
E për të drejtat e njeriut ka folur Avokati i Popullit për nderë të kësaj dite.
“Ne e vërejmë me punën tonë të përditshme që jo çdo herë qytetarët arrijnë me i kuptua me i njoftë edhe me i ditë të drejtat që ata i kanë, e që duhet me i gëzuar. E në mungesë të një informacioni të tillë shpesh herë ato cenohen dhe nuk reagojnë, mos reagimi kur shkelen të drejtat e njeriut pastaj bohet praktikë”, ka deklaruar avokati i popullit, Naim Qelaj.
Madje Qelaj tregoi se sa ankesa parashtrohen në këtë institucion brenda një viti.
Përafërsisht brenda një viti në institucion të Avokatit të Popullit parashtrohen mbi 1600 ankesa.
Kurse sa i përket shkeljeve më të shpeshta të të drejtave të njeriut, sipas Qelajt, janë: diskriminimi dhe avancimi në punësim, barazia gjinore dhe dhuna në familje.
Për nder të kësaj dite, televizioni ka kontaktuar edhe me KMDLNj, ku të njëjtin kanë thënë se Kosova nuk ka arsye për të festuar.
“Kosova nuk ka ndonjë arsye për të festuar 10 dhjetorin, por Kosova shënon këtë ditë si shënohet edhe në vendet e tjera vetëm sa për ti bërë rendin apo për të mbushur agjendën e 10 dhjetorit. Përndryshe Kosova në aspektin ekonomik, është shumë prapa nevojave të plotësimit të standardëve madje edhe minimale të të drejtave të njeriut”, kryetari Behxhet Shala.
E për shënimin e kësaj dite, Institucionet e Kosovës kanë organizuar aktivitete të shumta.
