Në shqyrtim të komisionit përkatës, janë 210 aplikacione të kandidatëve për t’u bërë noterë.
Brenda muajit, pritet që këta të intervistohen dhe të bëhet gati edhe lista e kandidatëve fitues.
100 noterët e rinj do të jenë në 18 komuna që aktualisht janë pa noterë, në mesin e të cilave hyjnë edhe katër komunat veriore.
“Nuk iu është ofruar kandidatëve që të vetpropozohen nëpër komuna, pasi kjo nuk parashihet me ligjin për noterinë apo ndonjë ligj tjetër. Mirëpo sipas pushtetit diskrecional të ministres së Drejtësisë, kandidatët e përzgjedhur si të përshtatshëm për të ushtruar detyrën e noterit do të licensohen në të gjitha komunat që janë pa noterë, duke përfshirë edhe komunat veriore”, thotë këshilltari politik në Ministrinë e Drejtësisë, Eros Gashi.
Këto mungesa të noterëve, po vlerësohet se kanë shkaktuar pasoja tek qytetarët.
“Qytetari nuk po mundet t’i realizojë të drejtat si rezultat i politizimit të përzgjedhjes së noterëve dhe krijimit të monopolit. Kështu që ka joshur njerëz që nuk janë të interesuar për profesionin, por për përfitim personal. Dhe konsideroj se veprimet e tilla politike, qoftë të kësaj qeverie apo qeverive të mëparshme, nuk i ndihmojnë zgjidhjes së problemit”, thotë avokati Kadri Osaj.
Pas këtij konkursi, nga Ministria e Drejtësisë u shprehën se do të plotësohen nevojat për 5-10 vitet e ardhshme.
