Fitorja e parë pas tre ndeshjeve e afron Brazilin një hap drejt kualifikimit për Kupën e Botës FIFA 2026, pasi mposhti Kolumbinë 2-1 në Brasilia.
Brazilianët nisën ndeshjen në mënyrën më të mirë të mundshme, pasi Vinicius Junior u rrëzua në zonë pas vetëm katër minutash lojë. Raphinha mori përsipër goditjen nga pika e bardhë dhe e dërgoi topin në cepin e poshtëm të majtë, duke kaluar ekipin e tij në avantazh.
Pjesa e parë nuk prodhoi shumë raste të tjera, dhe dukej se Brazili do të shkonte në pushim me epërsinë minimale, por Kolumbia barazoi në minutën e 41-të.
Pas një topi të fituar në gjysmëfushën e Brazilit, ish-mesfushori i Evertonit, James Rodriguez, asistoi Luis Diaz, i cili goditi fuqishëm në cepin e largët, duke mposhtur portierin e Liverpool-it, Alisson.
Me ndryshimet e shumta në fushë, të dyja skuadrat patën vështirësi për të krijuar raste të pastra, por Brazili përfitoi nga 10 minutat e shtesës në mënyrë perfekte. Në minutën e 99-të, Vinicius shkaktoi eufori te tifozët vendas kur gjuajtja e tij nga distanca u devijua dhe përfundoi në rrjetë.
Me këtë fitore, Brazili ngjitet në vendin e dytë në grupin kualifikues, ndërsa Kolumbia mbetet e gjashta, gjashtë pikë larg Bolivisë që ndodhet në zonën e play-off-it.
