Deputeti i zgjedhur i AAK-së, Lahi Brahimaj, thotë se kryeministri në detyrë, Albin Kurti nuk po i mban premtimet, për të cilat është zotuar gjatë fushatës elektorale për zgjedhjet parlamentare.
Kjo, pasi sipas tij letra e dërguar nga kryeministri në detyrë te LDK-ja është mesazh që Kurti “po i han qershitë e lagura”.
“Të gjithë i kemi parë deklarimet e Kurtit ndaj partive opozitare, deklarimi i tij ishte edhe ndaj PDK-së, ishte edhe ndaj LDK-së, ishte edhe ndaj AAK-së e Nismës, pra për të gjithë ‘hajvanët’. Siç thoshte Ganja në Parlamentin e Kosovës, kryeministri ‘po i han qershitë e lagura’. Realisht, ai provoi me Limajn për një koalicion të mundshëm, siç duket ai nuk i dhezi, tani ka provuar me Abdixhikun, por dihet se qëndrimet janë goxha të kristalizuara të LDK-së, që nuk do jenë pjesë e Qeverisë Kurti ose nëse vetëm Kurti pranon që t’ia jap LDK-së me udhëheqë qeverinë”, tha ai në emisionin “Ditari” në Tëvë1.
I pyetur se pse kryeministri në detyrë, Albin Kurti trokiti në derën e LDK-së, Brahimaj thotë se vështirë kuptohen synimet e tij, të cilat i quan “djallëzore”.
“Është zor me i ditë qëllimet djallëzore të Kurtit, por njëra ndër ato ishte edhe dalja e mesazheve të LDK-së në opinion, shfrytëzimi i ndonjë pakënaqësie, mundësia edhe e ‘peshkimit’ të ndonjë deputeti. Por, me aq sa e di unë dhe kam informata, LDK-ja është e prerë që me asnjë rrethanë nuk do të jenë në qeveri me Kurtin, dhe nuk besoj që ndonjë deputet i zgjedhur i cilësdo parti që do të shkojë në Qeverinë Kurti”, deklaroi ai.
Kurti të hënën i dërgoi një letër për të parin e Lidhjes Demokratike të Kosovës, Lumir Abdixhikun për takim. Madje, për këtë takim Kurti ia ofroi tri orare Abdixhikut. Nga LDK-ja ende nuk e kanë vendosur se a do të marrin pjesë apo jo./teve1.info/
