Përfaqësuesi i Lartë i BE-së për Politikë të Jashtme dhe Siguri, Josep Borrell ka thënë se shtetet anëtare janë të gatshme të marrin masa të mëtutjeshme ndaj Kosovës dhe Serbisë nëse palët nuk tregojnë gatishmëri për ta shtensionuar situatën dhe zbatuar obligimet nga dialogu.
“Dyja palët duhet të tregojnë gatishmëri për t’i zbatuar obligimet nga dialogu. Shtetet anëtare janë të gatshme të marrin masa të mëtutjeshme nëse nuk shihet progres. Është thënë se nga shtetet që aspirojnë të jenë pjesë e BE-së presim sjellje evropiane. Në ditët në vijim do të vazhdojmë kontaktin me dyja palët. Por, shtetet anëtare janë të gatshme të jenë aktive e të na përkrahin në punën tonë”, ka thënë Borrell.
SIpas tij, masat mund të jenë politike e financiare.
“Mund të konsiderojmë masat politikë për të limituar kontaktet politike, e masat financiare po ashtu. Duhet të jenë masa, u thash shteteve anëtare, që masat duhet të jenë proporcionale dhe të kthyeshme”, ka thënë Borrell në një konferencë për shtyp.
Borrell tutje ka shtuar se këto masa mund të ndërmirren “për ta rritur levën e BE-së”.
“Shtetet anëtare kanë nënvizuar shqetësimin për tensionet në vazhdim në veri të Kosovës dhe kam cekur rëndësinë që palët të shtensionojnë situatën, e të bëhet në përputhje me deklaratën e shteteve anëtare të bërë më 3 qershor. Mirëpresim lirimin e tre policëve të Kosovës që janë mbajtur në Beograd. Shtetet anëtare do të marrin masa nëse duhet, për ta rritur levën e BE-së e për ta përkrahur dialogun për normalizim”, tha Borrell në konferencë për media, pas takimit me ministra të jashtëm të shteteve anëtare të BE-së.
