Përfaqësuesi i Lartë i BE-së, Josep Borrell, ka dënuar në “termat më të ashpër të mundshëm” sulmin e sotëm ndaj Policisë së Kosovës, ku ka mbetur i vrarë një polic e një tjetër është plagosur.
Borrell, thotë se të gjitha faktet rreth sulmit duhet të vërtetohen, si dhe autorët përgjegjës duhet të përballen me drejtësinë.
“Dënoj në termat më të ashpër të mundshëm sulmin e shëmtuar nga një bandë e armatosur kundër policëve të Kosovës në Banjska/Banjskë në veri të Kosovës, i cili la të vdekur një polic dhe dy të plagosur. Të gjitha faktet rreth sulmit duhet të vërtetohen. Autorët përgjegjës duhet të përballen me drejtësinë”, është deklaruar Borrell, raporton teve1.info
Ai thotë se sulmet duhet të ndalohen menjëherë.
“Më shumë jetë të pafajshme janë në rrezik në armiqësitë e vazhdueshme në rrethinat e Manastirit të Banjskës. Këto sulme duhet të ndalen menjëherë.
Borrell ka bërë të ditur se EULEX-i është në terren dhe në kontakt me autoritetet dhe KFOR-in.
“EULEX-i, si reagues i dytë i sigurisë, është në terren dhe në kontakt të ngushtë me autoritetet dhe KFOR-in. BE-ja dhe shtetet e saj anëtare vazhdimisht u bëjnë thirrje të gjithë aktorëve që të punojnë për të de-përshkallëzuar situatën në veri të Kosovës”, ka thënë Borrell./teve1.info/
